中國商務部近日推出咗《手機、平板、智能手錶（手環）購新補貼實施方案》，香港居民只要持有有效回鄉證，就可以喺中國買手機、平板電腦、智能手錶等電子產品，連埋雪櫃、洗衣機、電視等大型家電，最高可獲2,000人民幣（約2,160港幣）折扣。補貼適用於單件售價唔超過6,000人民幣（約6,480港幣）嘅電子產品，同指定12類家電。計劃將由2025年1月1號開始，一直到12月31號結束。

【補貼範圍同優惠詳情】
根據方案，補貼重點包括兩大類：

1. 電子產品（手機、平板電腦、智能手錶）：每件單價上限6,000人民幣，可獲15%折扣，每件最多可以減500人民幣（約540港幣）。
2. 家電（雪櫃、洗衣機、電視、冷氣、電腦、熱水器、家用爐具、抽油煙機、微波爐、淨水器、洗碗機、電飯煲）：最高可獲20%補貼，折扣額最多達2,000人民幣。

【申請條件】
有中國身份證嘅人士可以喺淘寶等電商平台享受補貼，支付之後，補貼會自動轉賬到支付寶或者直接抵消部分款項。因為網購需要中國身份證實名認證，所以對香港人嚟講，目前最方便方法係用「雲閃付」App申請。申請者需符合以下條件：

• 持有有效回鄉證
• 已經實名登記嘅「雲閃付」帳戶
• 有中國手機號碼
• 有中國銀行卡或信用卡

【申請步驟】

1. 下載「雲閃付」應用程式，並完成實名登記；
2. 進入「全國政府補貼專區」，選擇「深圳」，提交申請；
3. 用中國手機號碼註冊帳戶，綁定中國銀行卡或信用卡；
4. 進入「領券頁面」揀補貼類別，按「領取」；
5. 輸入姓名、手機號碼同回鄉證號碼；
6. 簽署同提交電子承諾書，即可獲得相應折扣券；
7. 72小時內前往指定門市購買電子產品或家電，並用「雲閃付」掃碼付款享受折扣。

【使用限制同特別注意】

• 補貼券有效期為領取後72小時，必須喺門店使用「雲閃付」內用券掃碼支付先可以得到優惠。
• 電子產品單件售價上限6,000人民幣，家電最高可獲2,000人民幣補貼。
• 補貼計劃至2025年底，逾期就唔再適用。