美國特朗普政府近日公開點名，直斥香港首富李嘉誠家族掌控嘅長和控股子公司「和記港口公司」（Hutchison Ports）管理巴拿馬運河兩端港口，對美國構成重大威脅，特朗普更揚言現時呢種局勢「冇辦法接受」。外電消息指出，巴拿馬政府考慮向美方妥協，可能取消同和記港口公司嘅合約。

據《彭博》報道，消息人士透露，巴拿馬總統穆里諾（Jose Raul Mulino）領導嘅政府，正衡量取消同和記港口所簽合約嘅可行性。不過知情人士話，巴拿馬方面暫時未有作出任何最終決定，並會以避免訴訟同遵循正當程序嘅方式慢慢推進。對於呢件事，巴拿馬總統辦公室同和記港口都未有正式回應。

報道又話，如果巴拿馬政府真係取消咗和記港口合約，無疑等於送大禮畀美國總統特朗普，因為特朗普一直認為中國對巴拿馬運河控制得太多，甚至唔排除用武力奪回運河。和記港口一直經營巴拿馬運河附近五個港口之中嘅兩個，分別位於運河兩端。近年嚟，中國不斷蠶食香港自治，令國際社會都相當關注。

魯比奧本月2號訪問巴拿馬期間警告，必須採取措施壓制中國對巴拿馬運河「冇辦法接受」嘅影響力。事實上，巴拿馬運河原本由美國所建，1999年先正式移交畀巴拿馬政府。

和記營運嘅Balboa同Cristobal兩個港口，原本喺1997年簽咗特許合約，2021年曾經續約，有效期直至2047年。現時，在美方巨大壓力下，巴拿馬政府已經開始對和記港口進行審計。穆里諾同魯比奧會面後亦表示，巴拿馬唔會續簽加入中國「一帶一路」倡議嘅協議。

另一方面，特朗普高調揚言要「重奪」巴拿馬運河，喺當地民間引發強烈反彈。上週五，巴拿馬首都巴拿馬城有示威者焚燒咗特朗普同魯比奧嘅肖像。

上週四，穆里諾曾經公開強調，自己唔會同魯比奧討論任何有關巴拿馬運河所有權問題：「我冇可能就運河嚟談判，甚至連開啟談判程序都唔得。事實非常清楚，運河屬於我哋巴拿馬。」

根據幾十年前同美國簽訂嘅中立條約，巴拿馬對呢條水道擁有同運營嘅權力。不過，中國企業喺運河附近港口同碼頭所投資嘅金額相當龐大。特朗普近乎強硬奪取運河嘅立場，已經喺呢個戰略位置極度重要但面積細小嘅國家掀起強烈愛國情緒。

BBC報道，唔願公開姓氏嘅巴拿馬城居民瑪莉（Mari）表示：「呢件事實在太離譜。特朗普應該尊重條約，而條約入面並冇任何條款話我哋唔可以有中國公司營運港口。」佢補充指中國都喺美國唔少港口同城市有投資。佢解釋，好多巴拿馬人對當年美國控制運河嘅回憶仍然十分深刻，唔想再回到嗰個時代。

其實，美國同巴拿馬喺1979年簽咗條約，開啟咗交接程序，最終令巴拿馬喺1999年完全掌控運河。瑪莉再次強調：「嗰陣時，如果唔遵守美國規則，我哋連入運河區都唔得，否則就會被捕。一踏入嗰條邊界，就等於進入美國地盤。喺自己國家度，反而冇權利。依家我哋唔會再忍受。對於（特朗普）嗰番言論，我哋覺得好侮辱。」

部分巴拿馬人對特朗普「唔排除用軍事行動」奪運河特別敏感，因為令佢哋諗起1989年美國入侵巴拿馬，推翻統治者諾列加將軍（Manuel Noriega）時嗰種可怕經歷。嗰次衝突雖然只維持咗幾星期，美軍好快就擊潰咗巴拿馬軍隊。《I》