美國新任國務卿魯比奧（Marco Rubio）喺星期日（2日）訪問巴拿馬，進行佢上任後嘅首次外訪。魯比奧警告巴拿馬，必須即刻採取行動，終止中國對巴拿馬運河嘅影響，否則華府將會採取必要行動。

魯比奧喺出訪巴拿馬前表示，由香港註冊公司控制巴拿馬運河嘅進出口「不可接受」，形容香港「唔再自治」（no longer autonomous）。香港特區政府回應指，從未干預香港公司嘅商業運作，批評美國官員對巴拿馬運河營運事宜嘅指控毫無道理，並歪曲事實，特區政府對此表示強烈不滿同反對。

特區政府發言人聲稱，香港特區係中華人民共和國不可分離嘅部分；根據《憲法》同《基本法》，香港特區實行高度自治，亦實行自由貿易政策，保障貨物、無形財產同資本嘅流動自由。發言人又指，香港一直堅定支持多邊貿易制度，反對任何國家施加阻礙正常貿易或商業運作嘅措施或限制。

發言人表示，所有喺香港註冊嘅公司均需按香港法例及（如喺境外）當地法規營運，特區政府從未干預香港公司嘅商業運作。

美國總統特朗普多次揚言要「收返」巴拿馬運河，魯比奧日前喺電視節目中表示，有人爭辯話雖然涉事公司喺香港而唔係中國大陸註冊，但佢質疑任何喺中國內地或香港運作嘅公司，都要聽從中國政府指示，並形容香港「比任何時候都受中國操控得更嚴重」（more than ever controlled by China）。

美國國務院聲明指出，魯比奧喺與巴拿馬總統穆利諾（José Raúl Mulino）會面時，傳達咗美國總統特朗普嘅訊息，指中國嘅影響力威脅到巴拿馬運河，並違反美國同巴拿馬之間嘅協議，強調需要即刻採取措施改變現狀，否則美國將會採取必要行動，保護協議中嘅權益。

穆利諾表示，與魯比奧嘅會面親切同尊重，透露有意檢視部分巴拿馬與中國企業嘅協議，並宣布進一步喺移民問題上與美國合作，但重申巴拿馬政府對運河嘅主權唔喺商討範圍內。據悉，其中一項檢視嘅協議係2021年更新嘅長江和記實業（CK Hutchison Holdings）25年運河港口運營許可。

同時，穆利諾亦表明，唔會延續中國嘅「一帶一路」協議，並研究提前終止嘅可能性。佢強調，唔認為1977年簽署嘅中立條約現時有任何實際威脅，更指有必要與特朗普直接會面。另外，穆利諾宣布擴大2024年7月與美國國土安全部簽署嘅諒解備忘錄，同意接收由美國遣返嘅委內瑞拉、哥倫比亞及厄瓜多爾非法移民。

魯比奧上周警告，中國一旦與美國發生衝突，將會關閉巴拿馬運河。佢指香港企業喺巴拿馬運河大西洋同太平洋入口處運營兩個港口。佢稱如果中美衝突爆發時，中國政府要求企業關閉運河，佢哋就必須按指示行事，認為此事對美國構成直接威脅。

自2024年大選勝利以來，特朗普曾多次威脅取得巴拿馬運河嘅控制權，並聲稱運河運營受中國影響。佢亦拒絕排除動用軍事力量取得控制權，但佢周日表示唔認為軍事行動有必要，堅持批評巴拿馬違反協議，美方可能取回控制權。《I》