美國總統當選人特朗普（Donald Trump）將於本月20日正式宣誓就職，成為美國第47任總統。就職儀式將於當日美東時間中午12時（香港時間21日凌晨1時）於華盛頓舉行，由於寒冷天氣，部分活動將改喺室內進行。據報，特朗普計劃當日簽署超過百項行政命令，並喺一系列盛大舞會中結束當日行程。

儀式改室內 3場舞會盛大舉行

特朗普就職日早上，將率先前往華盛頓嘅聖約翰教堂參加傳統祈禱儀式，隨後喺國會山莊圓形大廳舉行宣誓儀式。呢次係繼1985年總統列根（Ronald Reagan）第二任就職後，再次選擇喺室內進行儀式。受邀嘉賓將改喺鄰近可容納2萬人嘅第一資本體育館觀禮。特朗普表示，儀式結束後將親自前往體育館同嘉賓會合。

宣誓儀式將由副總統當選人萬斯（JD Vance）率先宣誓，隨後由特朗普宣誓成為美國總統。鄉村歌手嘉麗·恩達活（Carrie Underwood）將獻唱《美哉美國》（America the Beautiful），為典禮增添氣氛。

特朗普喺國會山莊總統廳完成重要文件簽署後，將參加三場盛大舞會，包括「總司令舞會」、「自由舞會」同「星光舞會」。據悉，特朗普計劃全部出席，與各界嘉賓共度盛會。

特朗普透露，佢嘅第二任就職演說將以「團結、力量與公平」為主題，展示未來四年嘅施政願景。相比2017年首次就職時提出嘅「美國優先」，特朗普希望今次演說能夠為美國開啟「黃金歲月」。

佢接受NBC新聞訪問時表示，過去四年嘅政局混亂，令美國人民飽受煎熬，而未來將致力打造一個公平同和諧嘅社會。特朗普強調：「人們經歷咗地獄，係時候採取行動，絕不能再讓悲劇重演。」

行政命令全面改革 聚焦能源、邊境與多元政策

根據《華盛頓郵報》報道，特朗普將喺就職日簽署一系列行政命令，內容涵蓋撤銷妨礙石油鑽探嘅法規、宣布美墨邊境危機，以及廢除部分多元、公平與包容（DEI）政策等。特朗普喺佛州海湖莊園同多名共和黨保守派盟友會面時表示，第二任期將採取迅速果斷行動，「簽到手斷都要完成目標」。

特朗普希望利用民主黨分裂與士氣低落嘅機會，大膽推動全面性政策調整，並確保未來四年不受掣肘。

相比2017年首次就職時嘅社會對立與沿街示威，今次特朗普就職典禮顯得和平而隆重。美國國內商界巨頭同國際領袖亦表現出更大熱情。破例應邀出席嘅外國領袖包括意大利總理梅洛尼（Giorgia Meloni）、阿根廷總統米萊（Javier Milei）、厄瓜多爾總統諾沃亞（Daniel Noboa）與巴拉圭總統培尼亞（Santiago Pena），為典禮增添國際色彩。

特朗普表示，今次就職典禮標誌住美國新黃金時代嘅開端，佢承諾未來四年將推動美國國力同國際影響力再創高峰。《I》