由於「TikTok禁令」要求字節跳動（ByteDance）將TikTok美國業務賣畀非中國所有者，18日晚TikTok宣布將停止喺美國市場嘅服務，令1.7億美國用戶只能見到簡短嘅訊息：「抱歉，TikTok目前不可用。」19日中午，TikTok突然奇蹟般地「起死回生」，再次恢復服務，並發聲明感謝即將上任嘅美國總統特朗普（Donald Trump），指將同佢合作尋求長期解決方案。

TikTok服務恢復 特朗普承諾延緩禁令

TikTok喺18日向用戶發佈聲明，表示因應美國法律「TikTok禁令」19日生效，將逼使平台無法提供服務。不過，19日中午，TikTok奇蹟地宣布恢復服務，並感謝特朗普嘅支援。

特朗普喺Truth Social發文指，會於上任後發佈行政命令，暫緩執行TikTok禁令60至90日，並希望美國企業可以持有TikTok 50%嘅股權。佢強調：「我要求所有公司唔好讓TikTok關閉，任何幫助避免TikTok停止服務嘅公司都唔會承擔任何責任。」

TikTok行政總裁周受資亦確認，將出席特朗普嘅總統就職典禮，並繼續與美國政府就平台未來嘅營運進行磋商。

雖然特朗普嘗試挽救TikTok，但美國國會通過嘅「TikTok禁令」已經被聯邦最高法院確認合憲性。根據該法案，違規分發或更新TikTok內容嘅應用商店或網絡公司將面臨處罰。康奈爾大學科技政策研究所所長克雷普警告，特朗普此舉可能進入「未知嘅法律領域」，簡單推翻禁令或將引發更大爭議。

美國兩黨議員長期對TikTok持懷疑態度，認為TikTok嘅中資背景會被中共用作間諜活動及散佈虛假資訊。TikTok否認有關指控，但禁令背後嘅中美政治博弈顯然仍未平息。

特朗普同TikTok微妙關係 被指助力大選

《紐約時報》指出，特朗普喺TikTok上擁有超過1400萬粉絲，成為吸引年輕選民支持嘅重要力量。報道提到，特朗普喺舊年贏得總統大選嘅過程中，TikTok功不可沒。特朗普曾於2020年要求字節跳動出售TikTok美國業務，否則就要下架該程式，當時因聯邦法院阻止，TikTok得以暫時苟延殘喘。

《華爾街日報》則指，特朗普舊年3月與字節跳動美國大股東傑夫·亞斯（Jeff Yass）會面後，立場出現明顯轉變，令人猜測背後可能有更多商業考量。特朗普否認有關報道，強調自己未曾與亞斯討論TikTok事宜。

特朗普喺Truth Social表示：「美國應該持有TikTok嘅一半股權，咁我哋就可以拯救呢個平台，將佢交到可靠嘅人手中。」但目前並不清楚特朗普將如何說服字節跳動賣出一半股權，或者哪些美國企業或富豪會投入資金。

根據字節跳動資料，公司60%股權由全球機構投資者持有，包括美國大型金融公司。當中，亞斯聯合創立嘅海納國際集團（Susquehanna International Group）就持有字節跳動15%股權。如果美國投資者聯手，可能已經接近特朗普所要求嘅「50%股權」。

TikTok喺特朗普嘅支持下短暫復活，但背後涉及嘅法律同政治問題依然複雜。特朗普要如何面對國會同聯邦法院嘅挑戰，字節跳動又會否接受方案，TikTok喺美國嘅命運仍然充滿未知數。喺中美關係日趨緊張嘅背景下，TikTok事件將成為中美科技戰爭嘅重要觀察點。《I》