曾多次喺「黎智英案」中被提及嘅美國前副總統彭斯（Mike Pence），昨日（16日）低調現身香港。又喺同一日訪台，會晤台灣總統賴清德、副總統蕭美琴等被中方稱為「台獨」分裂勢力嘅人物。對此，港府僅表示無評論。

外國勢力殺到 港府毫無作為

彭斯今次訪港係出席由瑞銀主辦嘅「2025瑞銀財富透視」金融論壇，擔任主題對話嘉賓。論壇圍繞美國大選同其全球影響，內容涉及國際關係、經濟政策同地緣政治動態。

對於彭斯來港係咪會帶嚟國安風險，保安局回覆《信報》時表示，唔評論個別事件，但強調香港係一個自由同法治社會，任何人都可享有《基本法》同多個國際公約所規定嘅權利同自由，同時亦須遵守包括《香港國安法》在內嘅所有適用法律。

保安局表示，香港作為一個國際化城市，任何訪港人士都需尊重並遵守香港法律，包括《維護國家安全條例》。而對於彭斯此行，保安局未有透露係咪會邀請其協助調查，或相關行程如何避免引發國安風險。

彭斯曾喺特朗普（Donald Trump）任內擔任美國副總統，期間美國對多名中國同香港官員實施制裁，包括時任特首林鄭月娥、現任特首李家超同港澳辦主任夏寶龍等。彭斯亦曾多次就香港情況發聲，包括關注2019年「反送中運動」，以及支持《壹傳媒》創辦人黎智英。黎智英被控串謀勾結外國勢力罪，控方指黎智英曾與彭斯等多名外國政客直接聯繫，希望爭取對香港民主運動嘅支持。

彭斯同日訪台 與「台獨頑固分子」會晤

美國媒體《國會山莊報》報道，彭斯同（16日）抵達台灣，並與台灣總統賴清德、副總統蕭美琴進行會晤。據悉，蕭美琴喺駐美期間已與彭斯相識，而彭斯此行目的是「親眼了解情況」，並提醒台灣人民，美國係台灣堅定嘅盟友，唔會容許香港發生嘅事情喺台灣重演。

值得注意嘅係，北京當局曾多次狠批賴清德，指佢宣稱「台灣是主權獨立國家」同「中華民國和中華人民共和國互不隸屬」，係「台獨」分裂行為，並指賴清德多次暴露其為「台獨金孫」、「台獨工作者」嘅「頑固本性」。

至於蕭美琴則被北京當局列入所謂「台獨頑固分子」名單，根據中方說法，制裁包括但唔限於依據《反分裂國家法》、《中華人民共和國刑法》、《中華人民共和國國家安全法》等法規條款終身追究刑事責任，最重可判處死刑。

根據《港區國安法》分裂國家罪規定，任何人將香港特別行政區或其他中國領土分裂出去，均屬犯罪。首要分子或罪行嚴重者可被判無期徒刑或十年以上有期徒刑，情節較輕者亦可處三年以下有期徒刑或拘役。煽動、協助或資助他人從事相關行為亦屬違法，嚴重者可處十年以下有期徒刑。

《港區國安法》規定所謂犯罪行為無論係咪實施喺香港境內，行為人係咪為香港永久居民，均可能觸犯法例。《I》