《自由亞洲電台》報道，英國外相林德偉（David Lammy）同內政大臣顧綺慧（Yvette Cooper）近日聯署去信英格蘭規劃監督局，表明支持中國駐英大使館喺倫敦嘅重置計劃。此舉引發外界爭議，因為無論係情報部門、民間組織甚至地方議會都表達強烈反對聲音。有批評指工黨政府此舉係向北京妥協，為爭取經濟利益而犧牲國家安全，向中共傳遞錯誤訊息。

聯名信強調外交設施重要性

《金融時報》16日報道，林德偉同顧綺慧於14日聯署去信英格蘭規劃監督局，支持中國駐英大使館重置計劃，指「每個國家都應該喺對方首都擁有能正常運作嘅外交設施」。信中提到，大倫敦警察廳經檢視後認為新使館選址後警力足夠應付示威集會，因此撤回反對意向。而中方亦表示願意關閉倫敦市內7個外交設施以換取重置大使館嘅支持。

早前，新大使館選址方案已被倫敦塔村區市議會否決，大倫敦警察廳同當地居民亦表達反對意見，但工黨政府仍強調重置計劃係外交優先事項，並定於2月舉行為期8日嘅公聽會。

當地人強烈反彈

對華政策跨國議會聯盟（IPAC）高級分析員鄺頌晴批評，林德偉同顧綺慧主動聯署信，並施壓大倫敦警察廳改變立場，反映工黨政府迫切希望促成計劃，對英國嘅國安風險視而不見。鄺頌晴指：「工黨此舉非常不智，尤其喺財相李韻晴訪華返國後立即曝光，時間點非常敏感。」

「香港監察」創辦人羅傑斯（Benedict Rogers）認為，工黨政府此舉係向北京傳遞錯誤訊息，令中共認為英國願意屈服同妥協。他批評：「選址喺倫敦策略同歷史意義重大嘅地段，而空間不足以容納示威，加上情報部門同地方政府已強烈反對，政府仍一意孤行，令人憂慮。」

事件引起英國社會廣泛關注，有網民喺討論區Reddit形容，呢係一個「極壞」決定，認為現時已有大量證據顯示中共喺英國進行跨境鎮壓，重置大使館只會為北京提供更大規模嘅行動基地。有民眾批評工黨政府將國家安全置於經濟利益之後，反映其處於政策恐慌之中。

居於倫敦嘅羅傑斯補充，佢身邊幾乎無人支持重置計劃：「當地居民多年嚟多次組織反對聲音，大家一致認為，政府喺未顧及居民利益嘅情況下推進計劃，完全係不智嘅。」

工黨政府被指妥協經濟利益

鄺頌晴指出，工黨政府喺大使館重置問題上妥協，主要希望換取更多經濟利益，但中國現時經濟情況堪憂，呢筆「如意算盤」恐怕難以如願。佢表示：「中國本身嘅投資能力已大不如前，地方負債率高企，市場處於停頓狀態。即使英方開綠燈，亦未必換嚟實質得益。」

《金融時報》翻查資料發現，英國對中國嘅直接投資（FDI）達110億英鎊，但中國對英國嘅直接投資僅有40億英鎊。前首相卡梅倫（David Cameron）喺任內推動嘅英中「黃金時代」政策，至今已顯現疲態，許多協議被擱置或未見成效。《I》