隨著TikTok喺美國面臨「不賣就禁」禁令倒數，小紅書近期迎嚟大量美國用戶，被形容為「TikTok難民」嘅新棲身地，而字節跳動嘅美國業務去向亦成為全球關注嘅焦點。外媒報道指，美國候任總統特朗普正考慮上任後推遲執行禁令，為TikTok爭取多60至90日時間。

美國用戶湧入小紅書 如何審核成小紅書難題

鳳凰網報道，小紅書本週內湧入大量嚟自美國嘅TikTok用戶，平台一度顯得準備不足。據小紅書發布嘅招聘廣告，平台現正急聘英文內容審核員，要求包括大學英語六級425分以上，每天工作8小時，月薪人民幣7000至9000元，並提供其他福利。報道指，小紅書目前尚未配備自動翻譯功能，中國用戶喺平台上用英語向新用戶分享使用技巧，場面相當熱鬧。

小紅書素以生活分享為特色，避開政治議題，營造友善同和諧嘅社群氛圍。然而，隨著大量美國用戶湧入，帶有政治討論同性別相關話題嘅帖文急增，令平台審核壓力倍增。一個名為「中文課」嘅直播間更吸引超過30萬人觀看，有美國用戶喺直播中討論稅收政策甚至抱怨勞動條件，部分美國網友直接留言「你應該罷工」，與以往小紅書嘅運營環境大相徑庭。

若TikTok無法逃過「不賣就禁」命運，外媒指中國方面正考慮將TikTok美國業務出售畀富商馬斯克，其中包括讓馬斯克嘅社交平台X接管TikTok美國市場。不過，中方官員對此方案尚未達成共識，仍處於初步探討階段。

據了解，小紅書長期定位為女性友善平台，數據顯示2024年平台女性用戶佔比近八成。隨著美國用戶湧入，小紅書上出現大量涉及女性勞動、獨居女性及LGBTQ+議題嘅內容，有用戶對平台開放嘅語言環境表示憂慮，認為可能影響原有嘅和諧氣氛。

周受資獲邀就職典禮 特朗普或改變TikTok命運

《紐約時報》報道，TikTok行政總裁周受資將獲邀出席特朗普就職典禮，更被安排喺講台席就坐。報道形容，能坐喺美國總統就職典禮講台上的嘉賓，通常只限於前總統、總統家屬及其他重要人物。除咗周受資外，Tesla創辦人馬斯克、Meta創辦人朱克伯格同亞馬遜創辦人貝佐斯亦獲邀出席。

周受資自由小米跳槽至字節跳動後，近年頻繁與美國政商界周旋，包括多次代表TikTok喺國會回應議員提問。舊年11月，周受資據報曾多次與特朗普商界盟友馬斯克會面，試圖了解特朗普新政府對TikTok嘅態度。

據《華盛頓郵報》報道，特朗普正考慮上任後發布行政命令，暫緩執行TikTok「不賣就禁」禁令，為TikTok提供60至90日嘅緩衝時間。報道引述美國政府官員指，拜登政府亦正研究如何讓TikTok繼續喺美國運營，避免周日禁令生效。《I》