美國傳媒報道，3艘載有超過200萬桶俄羅斯原油嘅油輪，因美國上週實施新一輪制裁而滯留喺中國東部海域，引發全球能源市場震盪。消息指，呢3艘油輪分別係「Huihai Pacific」、「MERMAR」同「Olia」，原本預計將俄羅斯原油運往中國山東多個港口，但因山東港口集團拒絕受制裁油輪進入而被迫漂泊海上。

3艘俄油輪受阻 中國港口拒絕停泊

根據報道，3艘滯留油輪均從俄羅斯遠東科茲米諾港出發。「Huihai Pacific」原計劃駛往山東董家口港，近日卻改變航向，目前仍喺海上漂流。「MERMAR」同「Olia」原計劃駛往山東煙台港，但目前分別停留喺黃海不同區域。

英國媒體引述消息指，山東省港口集團已禁止受美國制裁影響嘅油輪進入旗下港口。資料顯示，山東省港口集團係中國省屬國有重要骨幹企業，旗下有包括青島港、日照港、煙台港同渤海灣港口喺內嘅21個主要港區，共超過330個泊位，係中國北方重要能源進口樞紐。

拜登政府喺1月10日宣布新一輪制裁措施，全面打擊俄羅斯石油生產同運輸，制裁對象包括180艘運輸石油嘅船隻、俄羅斯主要石油公司Gazprom Neft同Surgutneftegas，以及其子公司同相關高層官員。據數據分析公司Kpler估算，2024年約有5.3億桶俄羅斯原油將受到制裁，其中3億桶係運往中國，佔中國海運進口俄油嘅61%。

報道指，中國同印度係俄羅斯原油最大買家，受制裁影響最為直接。呢兩個國家可能需轉向中東、非洲同美洲購買原油，導致國際油價同運輸成本急升。

山東煉油廠考慮規避制裁

位於山東嘅獨立煉油廠長期係俄羅斯原油嘅主要買家。自美國制裁實施以嚟，山東港口對受制裁船隻高度警戒，煉油廠買家開始考慮如何規避制裁。有貿易商透露，業者正研究是否可以透過私人碼頭接收俄油，甚至利用油車運輸將原油秘密送入中國。

花旗集團表示，多達30%嘅俄羅斯油輪可能受制裁影響，導致每日約80萬桶原油供應受阻，進一步加劇國際能源市場嘅波動。

中國外交部辯稱唔了解

中國外交部發言人郭嘉昆喺1月8日例行記者會上被問及山東省港口禁止被美國制裁油輪停泊時表示，佢對有關情況唔了解。郭嘉昆強調，中方堅決反對美方缺乏國際法依據、未經聯合國安理會授權嘅單邊制裁同長臂管轄。

受制裁影響，國際油價顯著上升。紐約西德州中級原油2月交割價上漲2.25美元，收報每桶78.82美元，創舊年8月以嚟新高。布蘭特原油3月交割價亦上漲1.25美元，收報每桶81.01美元，同樣創下舊年8月以嚟新高。《I》