警方國安處繼昨（13日）「邀請」香港民研主席及行政總裁鍾庭耀同兩名民研職員到警署協助調查，又持法庭手令搜查民研位於黃竹坑嘅辦公室，搜查約8小時。今早再有行動，稱「邀請」鍾劍華嘅伍姓太太同兒子到警署「協助調查」。

警方國安處喺舊年12月24日公布新一輪懸紅通緝名單，涉及6名身處海外嘅港人，包括藝人鄭敬基、理工大學前助理教授鍾劍華、前「學生動源」召集人鍾翰林、黃大仙區議會前議員劉珈汶、新聞工作者何良懋同張晞晴。警方指控佢哋分別涉嫌煽動分裂國家、顛覆國家政權同勾結外國勢力危害國家安全，並為每人懸紅100萬元。

其中，鍾劍華被指違反《香港國安法》第二十一及二十九條「煽動分裂國家罪」及「勾結外國或者境外勢力危害國家安全罪」。警方稱，鍾劍華喺2024年5月至6月期間，多次透過社交媒體鼓吹港獨，並喺2020年12月至2023年11月期間，持續透過接受傳媒訪問、社交媒體貼文等方式，呼籲外國對中國同香港進行制裁及封鎖。

昨日（13日），香港民意研究所（民研）主席及行政總裁鍾庭耀被警方國安處帶走協助調查，據悉涉及協助在逃人士鍾劍華嘅案件。上午10時，鍾庭耀被帶到南匯廣場嘅香港民研辦公室協助調查。警方於辦公室內逗留整天，搜查並檢走大量文件，以追查鍾庭耀同鍾劍華之間有無聯繫，並調查民研是否曾向鍾劍華提供資金或涉及勾結外國勢力。

至傍晚6時許，鍾庭耀及兩名民研職員在探員陪同下離開辦公室，登上警方車輛被帶返警署進一步調查。警方強調，案件仍處於調查階段，暫時無人被捕。保安局局長鄧炳強表示，懷疑鍾庭耀及民研與鍾劍華有關，但案件與民研進行嘅民意調查無直接關係。

鍾劍華喺Facebook發文回應，指自從離開香港後，除咗喺2022年4月底參與過一次民調發佈會評論外，從無與鍾庭耀有過深度聯繫，只係過年過節時偶爾互發問候。佢並祝願鍾庭耀平安。

鍾庭耀則表示，鍾劍華喺2022年4月合約期滿後，已結束與香港民研嘅合作同僱傭關係，之後雙方再無聯絡。佢強調，民研一向奉公守法，不會踩紅線或黑線，舉辦活動前都會充分考慮法律因素，相信研究工作唔會因此事件受到影響。

舊年7月，鍾庭耀曾表示，雖然現有計劃下民研仍會進行六四調查，但結果只作內部參考，不會公開發表。佢指出，如有學術或媒體機構需要數據進行研究，只要承諾不犯法便可申請使用，費用安排有待確認。

面對近期風波，鍾庭耀表示，民研會繼續堅持初心，重新起步。佢指，民研已經蓄勢待發，未來嘅目標唔再只係三十年前嘅憧憬，而係回饋香港市民多年以嚟嘅支持，同以另類方法將香港精神轉化成國際文化一部分，服務全世界。《I》