由於韓國內需疲弱，經濟持續低迷，韓國政府宣布將農曆新年假期延長，原定嘅1月28日至30日三日假期，新增1月27日為臨時國定假日，連同週末，形成六日長假期。如果市民喺31日請多一天假，更可以享受連續九日嘅假期。政府希望藉此促進國內旅遊同消費，振興內需經濟。

韓國代理總統兼企劃財政部長崔相穆今（14日）喺國務會議後表示，希望透過延長假期，畀市民好好休息，同時鼓勵國內旅遊同消費活動，以提振本地經濟。佢坦言，韓國長期內需不振，經濟情況惡化，連就業市場都未見起色，政府對此向國民致歉，希望今次假期可以為經濟注入新動能。

為配合農曆新年假期延長，韓國政府公布多項內需刺激措施，包括27日至30日全國高速公路免收通行費，並提供高鐵（KTX）同SRT回程票三至四成優惠，方便市民回鄉或者外出旅遊。同時，政府將開放地方政府及公家機關停車場，進一步方便市民出行。政府希望透過多管齊下嘅措施，鼓勵國內消費，緩解經濟困局。

根據韓國央行嘅預測，韓國GDP增長可能僅為1.9%，主要受出口同消費疲弱影響，甚至可能因全球貿易進一步惡化而降至1.7%。經濟合作暨發展組織（OECD）亦將韓國2025年GDP預測下調至2.1%，而國際貨幣基金組織（IMF）就喺舊年11月將韓國2024年增長預估值從2.2%下調至2%。

韓國對外貿易更陷入逆差危機。自2018年對中國貿易順差達到556億美元高峰後，逐年下降。2023年更錄得逆差達180億美元，全年逆差或逼近200億美元，顯示韓國對中國貿易結構性問題越發嚴重。

韓國與中國嘅經濟依存度高，但近年韓中貿易逆差擴大，對韓國經濟構成壓力。自2015年韓中自由貿易協定（FTA）生效後，雙方經濟合作大幅增長，但中國對韓國核心產業嘅開放程度有限，例如面板、石化產品等多項關鍵商品嘅降稅時程較長，實際效益有限。

另一方面，中國透過扶植本土企業，加快技術升級，逐步瓜分韓國企業喺液晶面板、智能手機及電動汽車等領域嘅市場份額。2023年，韓國對中國出口嘅半導體產品更暴跌超過45%，反映韓企喺高科技領域嘅競爭優勢正被削弱。

韓中FTA協定中，部分產品如化工原料、蓄電池、電腦同工業電子設備嘅關稅減免幅度較大，導致大量中國零關稅產品輸入韓國市場，進一步擠壓本地企業嘅生存空間，成為韓中貿易逆差擴大嘅原因之一。

有官方色彩嘅智庫，韓國國際經濟政策研究所（KIEP）認為，因為中國喺石化、鋼鐵以及半導體等，唔同產業都有產能過剩嘅情況，故壓低全球售價，韓國以往嘅競爭力受創。中韓合作嘅關係，已變成相互較量。《I》