社交媒體巨頭Meta近日宣布重大政策調整，結束喺Facebook同Instagram平台上實施嘅美國事實查核計劃，並引入新機制處理內容審核。呢一舉措被視為配合總統當選人特朗普即將上任後嘅政策方向，亦可能係Meta創辦人朱克伯格（Mark Zuckerberg）對特朗普多年批評嘅回應。

共和黨、馬斯克長期抨擊事實查核

朱克伯格喺發文中表示，Meta將裁撤事實查核人員，指其政治偏見過深，已經破壞咗用戶對平台嘅信任，反而得不償失。他指出，Facebook同Instagram將採用類似於X（前稱Twitter）嘅「社群筆記」（community notes）功能，並率先喺美國推行。

朱克伯格認為，新方法將有助於重建平台用戶之間嘅信任，同時擺脫過往被視為帶有偏見嘅審核機制。

Meta嘅政策變動，與特朗普所屬共和黨同X平台持有人馬斯克（Elon Musk）嘅立場高度一致。共和黨同保守派長期批評事實查核計劃係一種變相審查制度，認為其針對右翼聲音尤甚，令佛羅里達州同德州等地推動制定法律限制內容審核。

馬斯克喺Meta宣布結束事實查核計劃後隨即喺X平台發文表示「很酷」，對Meta嘅決定表示讚賞。

朱克伯格與特朗普關係回暖？

自特朗普喺舊年11月勝選後，朱克伯格多次展現修補關係嘅意圖。除咗向特朗普就職基金捐贈100萬美元，Meta今次調整內容審核政策亦被視為進一步向特朗普示好。

特朗普過去多次批評Meta同朱克伯格，指控平台對其存有偏見，並揚言重返白宮後將對朱克伯格採取行動。喺佛羅里達州海湖莊園（Mar-a-Lago）接受訪問時，當被問到Meta政策改變係咪因應其威脅，特朗普笑稱：「可能係吧。」

國際事實查核聯盟（IFCN）主管霍蘭（Angie Drobnic Holan）對Meta嘅決定表示憂慮，形容此舉係喺「極端政治壓力下」作出嘅決策。霍蘭警告，停止事實查核計劃可能令用戶更難獲取準確同可靠嘅資訊，影響佢哋日常生活決策同社交互動。

特朗普喺2021年1月6日國會山莊事件後，其Facebook帳號被停用，直至2023年初才重新啟用。事件加深咗特朗普同Meta之間嘅矛盾，成為特朗普多次批評Meta嘅原因之一。

Meta今次調整政策標誌住朱克伯格試圖與特朗普尋求和解，但亦引發對平台如何平衡言論自由與資訊準確性嘅爭議。《I》