前中國解放軍女子Susan Chen同其律師女兒Linda Lu喺英國多次滋擾鄰居，包括跟蹤、辱罵、製造噪音等行為，最終被英國法院判處監禁5年半，並禁止再進入當地社區或與受害人聯絡。法官形容其行為「惡劣至極」，陪審團一致裁定二人罪成。

母Susan解放軍背景曝光

61歲嘅Susan Chen被英國廣播公司（BBC）形容為「前中國情報官員」。佢喺庭上供稱，曾喺中國解放軍服役14年，軍階至少校，並喺軍中遇到Linda父親，後者軍階曾升至將軍。Susan透露，自己透過軍中職業累積財富，成為百萬富翁後選擇移居英國，與英國伴侶展開新生活。

2023年3月，Susan同伴侶搬入林肯郡巴辛咸村（Bassingham）一間租嚟嘅半獨立屋，隨後35歲嘅女兒Linda Lu亦搬嚟同住。但短短4個月內，母女二人與鄰居James和Lynn Smith夫婦因修剪庭院樹籬問題發生爭執，Susan聲稱樹籬屬於自己財產，並多次走出屋外指責鄰居。爭執升級後，母女二人對Smith一家展開跟蹤同騷擾。

控方律師Steve Taylor指出，爭執始於2023年7月18日，至7月15日至9月29日期間，Susan同Linda經常發出噪音，並於8月23日播放大聲敲擊聲干擾鄰居生活。Smith一家為逃避滋擾選擇喺8月底外遊，但返家後僅15分鐘便再次聽到噪音，更被母女二人辱罵「弱智」。

母女二人喺2023年10月被警方起訴，遭關押約半年，案件審訊歷時5周，最終於2024年12月由陪審團裁定罪成。庭上，二人聲稱自己先係受害者，但其說法被陪審團迅速駁回。

法官James House KC判刑時形容，Smith一家受到長期恐嚇，母女二人嘅行為係「精心策劃嘅持續犯罪」，對社區造成嚴重困擾。法庭判處二人監禁5年半，並禁止二人再進入巴辛咸村，或與Smith一家及相關案件人員聯絡。

女Linda濫用律師身份

庭上披露，Linda並無案底，但Susan曾於2020年喺諾定咸郡Baldeton村因襲擊一對年老夫婦被定罪。當時Susan喺鍛煉時，用拐杖攻擊該對夫婦，甚至向佢哋吐口水，行為惡劣。

負責調查案件嘅警官Jordan Bathie-Drexler表示，母女二人嘅行為令人震驚，係其十年警察生涯中從未見過咁持續、毫無理由嘅犯罪行為。Linda更利用其律師身份，多次向Smith一家發出民事索償信，試圖恐嚇受害人。

Linda曾喺多間國際頂尖律師事務所工作，包括Pillsbury Winthrop Shaw Pittman、Cadwalader Wickersham & Taft及Fried Frank Harris Shriver & Jacobson，據報初級律師年薪高達15萬英鎊（約145萬港元）。

Linda過去亦涉及其他爭議，2021年因喺Instagram帳號批評前同事而被起訴，雖最終於2022年獲判無罪，其帳號其後被刪除。Linda喺LinkedIn形容自己係「司法偏見、歧視同腐敗」嘅受害者，指控有人偽造法律文件，試圖對佢進行不公平對待。《I》