2024年即將結束，港府喺今年3月底完成《基本法》23條立法後，曾表示可以全力拼經濟。不過，香港經濟復甦情況遠遜預期，結業潮成為社會熱話，網上甚至出現專門關注結業潮嘅社群，分享全港商舖結業消息。而2025年前景亦唔樂觀，有調查顯示44%企業看淡本港明年經濟表現。

老字號品牌紛紛結業 盛事經濟遇挫

據《Yahoo新聞》統計，今年全線結業嘅連鎖品牌至少有25個，其中11個屬於香港本地品牌，包括連鎖超市、健身中心同戲院等。其中最為人熟悉嘅包括擁有44年歷史嘅凱施餅店、38年嘅連鎖健身中心舒適堡，同連鎖食品店大昌食品等。

除此之外，今年先後結業嘅商舖同食肆中，唔少係深受市民喜愛嘅老字號茶餐廳。當中最受關注嘅係喺12月25日聖誕節當日結業嘅鴻運冰廳餅店，為唔少香港人留下唏噓。

面對經濟低迷，港府今年初大力推動盛事經濟，希望吸引更多遊客訪港。全年共舉辦超過240場活動，其中最矚目嘅係由《Tatler Asia》主辦嘅美職聯球會國際邁阿密同香港隊嘅友誼賽。港府為此提供M品牌認證及1,600萬港元資助，並以國際邁阿密隊長、世界球王美斯作為宣傳重點。

然而，球迷期待嘅美斯同蘇亞雷斯並未喺法定時間內出場，引起場內接近4萬名球迷極大不滿。賽事最終由國際邁阿密以4比1取勝，但頒獎禮期間現場響起噓聲，觀眾高呼「回水」。呢場港府期望打響頭炮嘅盛事，最終以尷尬場面收場，成為一場「醜事」。

商界對前景悲觀 投資意欲減退

香港總商會喺12月中發表嘅2024年商業前景問卷調查顯示，超過44%受訪企業看淡未嚟一年嘅經濟前景，比例較2020年新冠疫情首年更高，悲觀情緒創下近5年新高。

調查喺11月12日至26日進行，共收集219份來自各行業嘅回覆，包括專業服務、進出口貿易、金融服務等，覆蓋中小企同大企業。調查指出，全球經濟放緩、營運成本高昂同地緣政治局勢緊張係影響營商環境嘅主要因素。

數據顯示，企業投資意欲顯著減退。整體表示會增加在港投資嘅企業比例由舊年嘅18%降至今年嘅14.2%，大型企業由舊年嘅31.7%更大幅減半至15.8%。總商會總裁楊偉添表示，企業投資意欲趨向審慎，一方面係因舊年疫情復甦後已經投入資金，但未見明顯成效；另一方面亦係因環球經濟前景不明，令企業採取觀望態度。

調查顯示，只有31.1%受訪企業預期業務喺來年會增長，45.2%認為業務維持不變，而17.4%則預計會進一步收縮。在招聘方面，只有26%企業計劃增聘人手，49.8%選擇維持現狀，17.4%則計劃裁員，反映企業喺成本壓力下更趨謹慎。《I》