多年來，北京當局透過打壓英語教育、減少國際化課程同推行民族主義政策，營造出反美抗外同埋所謂嘅文化自信。不過，近日中國官媒突然調轉風向，高調鼓吹「中美共贏」，更以前黨魁毛澤東如何自學英語作宣傳，令外界瞠目結舌。

中共中央黨校主管嘅《學習時報》近日發表署名文章，頌揚毛澤東當年對英語學習嘅重視，形容佢喺延安時期就已經自學英文，建國後更加努力抽時間閱讀大量英文參考資料。文章稱，毛澤東直至晚年，喺多種疾病纏身嘅情況下，依然堅持每日閱讀英文新聞稿，專心鑽研英語。

北京當局近年對英語教育嘅壓制眾所周知。2021年，中共推行「雙減政策」，減少英語教學時段，名義上係為咗減輕學生學習負擔，實際上則係迎合民族主義浪潮。同年，上海更禁止小學期末英語考試，《習思想學生讀本》取代英語成為必修課。知名英文學習App「Duolingo」亦喺中國大陸下架。

呢一系列政策導致中國多間學校嗅到風向，大幅縮減英語課同裁減英語教師。去年，西安交通大學更宣布取消大學英語水平考試作為畢業條件，進一步引發「與國際接軌」倒退嘅廣泛討論。

2022年初，喺冬季奧運即將開幕嘅時候，北京地鐵站嘅中英文標示作出咗大規模更改，將以往使用咗40年嘅「Station」英文標示，幾乎全部改成咗拼音嘅「Zhan」。連同方位指示嘅「East、West、South、North」亦一併變成咗「dong（東）、xi（西）、nan（南）、bei（北）」。例如，「北京南站」本來應該係「Beijing South Railway Station」，但喺當時就變成咗「Beijingnan Zhan」。

不過，近期中共喉舌開始改變對美宣傳基調。中共機關報同官方喉舌《人民日報》近日連續刊文，呼籲中美兩國「校準正確航向」，推動關係穩定向好發展，加強合作。《人民日報》更舉辦「中美友好合作故事」徵文活動，並以大篇幅介紹「鼓嶺故事」與「鼓嶺情緣」，意圖重塑中美友好形象。

官媒文章提及中美關係過往嘅良好互動，包括1971年「乒乓外交」促成雙方關係解凍，以及中美建交以來嘅合作歷程，強調兩國利益早已「深度交融」，即使經歷風風雨雨，仍總體保持向前發展。

而北京地鐵站嘅英文標示逐步恢復，「Zhan」再度被「Station」取代。市民喺2023年中旬發現，部分地鐵站已經將Zhan改番為Station。喺2024年夏天，新嘅標準要求所有車站將「站」重新譯為「Station」，回到以前嘅英文翻譯方式。

北京當局對英語教育嘅打壓同「閉關鎖國」政策曾被外界視為去全球化嘅明確信號，但今次突然轉向鼓吹中美合作，甚至刻意吹捧毛澤東學英語，引發外界質疑中共宣傳方針嘅搖擺性。有評論認為，中共此舉或係為迎合美國新政府，試圖營造友好氛圍，以爭取緩和中美緊張關係。

雖然官媒一再表現出修補中美關係嘅意圖，但喺美國兩黨對華政策趨於一致嘅背景下，北京是否能如願以償仍屬未知數。另一方面，過往反美嘅強硬宣傳對中國內部民意嘅影響亦難以短期內逆轉。《I》