中國官僚主義同形式主義近日再爆笑料，廣東梅州市一間中學竟要求學生簽署荒謬承諾書，聲稱如發生自殘或自殺，校方無需承擔任何責任，學生同家長亦唔可以追究損失或索賠。呢份承諾書消息曝光後迅速引起網絡群嘲，當地教育局隨即下令學校收回並作廢。

教育局緊急介入 處分校方

據內媒《瀟湘晨報》報道，事件發生喺梅州市五華縣水寨中學。有網民喺社交平台爆料，指學校要求學生簽署一份內容驚人嘅承諾書，當中明確寫道：「如果我出現自殘、自殺的行為均與學校無關，我本人及家長或監護人不會以任何理由向學校及學校工作人員主張任何損失和賠償，也不會干擾學校正常教學秩序。」

呢份承諾書喺網絡熱傳後，迅速引發輿論關注，記者曾多次致電水寨中學查詢，但校方電話一直無人接聽。

事件曝光後，五華縣教育局迅速作出回應，表示已展開調查。教育局通報指出，12月23日下午，水寨中學以「珍惜生命」為主題舉行班會，並喺活動期間要求學生簽署含有「不當內容」嘅承諾書。教育局已責令校方立即收回全部已簽承諾書並作廢，對校方負責人進行約談，並喺全縣通報批評。

教育局亦要求校方透過多種形式向學生同家長解釋說明，同時承諾將舉一反三，加強對各學校嘅監督管理，切實保障學生嘅身心健康。

網民群嘲：荒謬甩鍋手段

呢份承諾書被曝光後，微博同其他討論區湧現大量批評聲音。唔少網民指，呢份所謂嘅承諾書就係一份「免責條款」，但根本毫無法律效力，因為學生係未成年人，並無民事行為能力。有人直斥校方領導唔懂法律，只知道推卸責任，仲有網民爆料，自己或者仔女以前都被學校要求簽過類似嘅承諾書。

事件背後，亦有網民喺討論區指學校推出承諾書可能係迫於無奈。近年，中國發生多宗學生喺校內輕生嘅悲劇，唔少家長向校方追責索賠，令學校同教師面對前所未有嘅壓力。一名網民留言話：「現在老師真的變成高風險行業，教不好要負責，學生出事又要賠償。」

不過，更多人認為，無論壓力幾大，校方都唔應該用咁荒謬嘅方式去推卸責任，反而應該加強對學生嘅關愛同心理健康輔導。

水寨中學事件成為網絡熱議嘅焦點，亦再次暴露出中國教育體系內嘅深層問題。專家指出，當局過度重視數字同政績，忽略咗學生心理健康，導致學校將資源更多投入到表面工程，而非真正照顧學生需求。《I》