《彭博》報道，繼美國財政部警告香港金管局及發鈔銀行勿與俄羅斯做生意後，香港聯繫匯率制度正面臨前所未有嘅挑戰。消息指，美國前總統特朗普喺上任期間曾考慮將港元同美元脫鉤，而如果特朗普出年初重返白宮，呢個計劃或再成為現實，中美金融競爭嘅焦點可能直指香港。

《彭博》引述專家分析指，中國正嘗試建立新嘅國際金融體系，利用港元與美元掛鉤嘅特性，加上香港可自由兌換同基於西方法律體系嘅優勢，將香港打造成為中國囤積美元嘅重要樞紐。事實上，香港近年積累咗大量美元儲備，反映亞洲出口商傾向將收入存放喺美國之外地區，而呢啲存款多以美元計價，再轉換為港元借貸俾亞洲各國借款人，從而避開美國金融監管。

報道指出，中國早喺10年前已經透過「人民幣自由化」嘗試削弱美元嘅全球地位，但由於匯率貶值、資金外流同無法融入西方金融體系等問題，計劃最終告吹。如今，香港嘅金融地位成為中國新金融體系不可或缺嘅一環，而呢種對美元主導地位嘅潛在威脅，可能令特朗普重新考慮打擊香港聯繫匯率制度。

根據《彭博》喺2020年報道，特朗普喺任內曾經提出港元與美元脫鉤嘅計劃，但最終因內部反對聲音而擱置。反對者認為，呢項措施可能傷害香港銀行體系，甚至影響美國利益。然而，隨住美國政府同國會對香港支持度下降，尤其將香港視為中國、伊朗、俄羅斯同北韓等「極權國家」嘅金融樞紐，華府對港政策已出現明顯變化。

報道指出，特朗普若再度上任，可能進一步對香港聯繫匯率制度出手，將其視為中美金融戰嘅新戰場。而對香港而言，脫鉤一旦實施，可能觸發金融市場震盪，甚至改變香港作為全球金融中心嘅地位。香港聯繫匯率制度係自1983年以嚟嘅金融穩定基石，但隨住美中競爭加劇，其命運正變得不確定。

同時，《彭博》亦報道，香港金融市場正成為美中金融戰中嘅焦點。香港證監會上月搜查超過十間金融公司同個人辦公室，包括本地經紀行、美國承銷商代表以及支持納斯達克上市公司嘅投資者，指控佢哋涉及「唱高散貨」操作。

另有消息指，紐約交易所亦對部分香港公司IPO前嘅投資者背景展開調查，包括投資者身份、同公司關係以及股份分配等細節。呢啲行動反映，美國正加強對香港金融活動嘅審視，尤其係涉及國際金融市場嘅部分。《I》