據《日經中文網》報道，中國政府正研究最快喺出年上半年恢復進口日本水產品，目的係改善日中關係，以提升喺應對美國候任總統特朗普嘅「美國優先」政策時嘅談判能力。

報道指出，中國方面已對福島第一核電廠嘅核處理水進行咗海水樣本檢測，初步認為安全性可以獲得保證，因此開始討論解除進口禁令嘅可行性。中方認為，呢一步驟係改善中日關係嘅重要舉措，特別喺當前國際形勢緊張嘅背景下，中國需要拉近同日本等出口大國嘅合作關係。

據了解，日本政府目前計劃喺出年5至6月期間舉行中日韓領導人會談，並考慮邀請中國總理李強出席。為咗為呢次會談鋪路，日本有意率先邀請中國外交部長王毅訪日，藉此推動雙邊交流。報道指，中國政府有可能喺呢啲外交活動期間，正式宣佈解除對日本水產品嘅進口禁令。

報道分析，中國有意恢復進口日本水產品，亦係基於應對特朗普政策嘅需要。特朗普喺其「美國優先」政策中要求盟國承擔更多責任，對出口國家施加壓力。中方認為，改善同日本等主要貿易夥伴嘅關係，有助提高喺國際談判中嘅話語權，同時分散美國壓力。

報道提到，日本政府喺今年9月已經宣佈，中日兩國達成協議，喺國際原子能總署（IAEA）實施追加監測措施下，中國將恢復進口符合安全標準嘅日本水產品。不過，雙方至今未公布具體嘅重啟時間表。

專家指出，中日經貿關係喺東亞區域合作中具有重要地位。隨住特朗普「美國優先」政策進一步推進，中方需要透過強化同其他主要經濟體嘅關係，來平衡其國際影響力。此舉亦為中日雙方創造更多合作機會，喺能源、科技同食品貿易等領域可能帶嚟新嘅突破。

中國喺去年8月日本開始排放核處理水時強烈反對，稱之為「強行排放核污染水」，並採取停止進口日本水產品嘅措施，仲喺國際會議等場合批評日本嘅做法。

面對中方嘅反應，日本政府多次要求撤銷相關措施。前日本首相岸田文雄去年11月喺美國三藩市同中國國家主席習近平會談時，當面要求中國基於科學根據作出冷靜嘅回應，並同意通過協商同對話搵出解決問題嘅方法。

去年8月24日，港府跟隨中央政府對日本嘅做法，宣布禁止來自東京、福島、千葉、栃木、茨城、群馬、宮城、新潟、長野同埼玉10個都縣嘅水產、海鹽和海藻食品進口本港。若中日兩國達成協議，港府會否跟隨中央放寬日本水產品限制？唔少網民都認為極有可能。

喺「連登討論區」上，有網民話：「如果中國取消，香港一定跟，好似武肺開放咁，外國全部開晒生活如常，香港死都唔開，中國一開香港就狗衝一齊開」、「做卒仔唔跟貼啲，下次想跟都冇得跟」、「香港班走狗又要轉軚，好似肺炎咁，昨天就世紀病毒，隔一日就全面開放」。

日本駐港總領事館早前指出，受港府對日本水產品實施管制影響，去年9月至12月日本出口香港水產價值按年大跌33.1%至46.9%。批評港府管制措施並不基於科學證據，又指世界其他國家少有實施類似管制，對此表示遺憾(regrettable)。

日方又指國際原子能機構今年1月和7月發表報告多次確認排放核處理水安全，日方將繼續提供高透明度同可靠嘅科學數據，要求港府即時移除對日本水產嘅管制措施。《I》