中國國安部今（23日）喺官媒《新華社》以「警惕評論區裡的諜影重重」為標題撰文，話發現外國特務機構利用中國網上社交媒體嘅評論區，去偷取所謂嘅「國家秘密」同干擾中國運作，仲聲稱呢啲行為已經對「國家安全」構成威脅。

呢篇文章話，所謂境外間諜情報機關可能扮成對政治、經濟、軍事、科技等話題有興趣嘅「網友」，潛伏喺網上評論區度，以問問題、辯論或者交朋友方式，去搵機會探聽同「國家機密」有關嘅情報。仲舉例話，有外國特務機構會透過人工篩選或者用演算法捕捉等方法，喺一條涉及中國科技項目嘅影片評論區，去套取同科研裝備參數、編號、研發人員等敏感訊息。

文章又指，有外國特務機構會招募「水軍」或者用自動化帳號，喺評論區度喪發各種抹黑中共政府同政策嘅言論，甚至故意歪曲歷史，想誤導民眾。某些外國特務機構喺關於中國歷史英雄人物嘅網上評論區，狂刷所謂「野史」同「偽史」，意圖去貶低同抹黑中國嘅歷史文化同英雄偶像，削弱中國民眾對英雄同歷史文化嘅認同。

文章繼續話，外國特務機構可能大量開假帳號，故意喺評論區度洗板同主導話題，激化內部矛盾、搞對立，好似想帶偏整個輿論風向。又舉例指，有外國特務機構惡意揀敏感話題嚟做文章，喺評論區度發表反動言論，煽動民眾情緒，企圖搞亂中國社會。

之後，國安部就呼籲中國民眾要「保持警惕」，增強「國家安全意識」同所謂「反間防諜意識」。國安部建議如下：

1.加強保密意識
文章指，所有民眾，尤其做緊同機密有關崗位嘅人，喺評論區唔好透露任何涉密資訊，唔好畀人知你接觸到咩機關或者咩機密工作。總之一句，千祈唔好亂講嘢，否則可能就畀冠上「危害國安」嘅罪名。

2.提升辨識能力
文章話，網絡訊息咁多又雜，唔好畀虛假消息或者惡意引導迷惑到。一旦發現有咩反動、敏感，或者危害中國政府政治安全嘅負面信息，就要保留證據同舉報。

3.堅守客觀真實
最後，國安部要求中國民眾唔好隨便轉發未經證實嘅消息，亦唔好編造不實內容，尤其唔好貼文抹黑所謂「國家歷史、革命歷程同發展建設」等。如果懷疑有外國特務喺評論區刺探涉密情報，或者發現有煽動顛覆性言論等「可疑線索」，就要透過12339國安機關電話、官網（www.12339.gov.cn）或國安部微信舉報，亦可以直接去當地國安部門報案。《I》