美國眾議院兩黨原本達成支出法案協議，可以讓聯邦政府維持運作至出年3月，卻因馬斯克介入而橫生波折。有民主黨國會議員批評，一個冇選票產生、擁有巨額身家嘅富豪，竟可以插手國家決策到如此地步，簡直可稱為同特朗普一齊嘅共同總統。

據美國媒體Axios報道，共和黨籍聯邦眾議院議長約翰遜 （Mike Johnson）早前同民主黨達成共識，推出一項接近1550頁長的綜合支出法案，內容涵蓋災難救援、農業補貼、國會議員加薪等兩黨共識重點，原本打算以此確保美國聯邦政府順利維持運作至2025年3月14日。

點知部分共和黨人唔收貨，加上即將喺特朗普內閣中擔任要職嘅馬斯克頻頻出招，喺社交平台密集發文高調反對，特朗普亦表態叫共和黨人「翻案」。議長約翰遜隨即抽起多條原本法案條款，再加上一項兩年期提高債務上限嘅新條文，以討好特朗普陣營。

但呢份經馬斯克「攪局」後重煉嘅版本，喺眾議院表決時以235票反對、174票贊成被大比數否決，不但未達三分之二門檻，甚至有38名共和黨議員「倒戈」，公然唔畀面特朗普。

事實上，馬斯克18號已經用社交平台X向眾院共和黨人施壓，要求推翻原有兩黨協議嘅支出法案，連環貼文中不乏誤導同失實內容。議員們坦言，佢哋辦公室電話比受馬斯克貼文影響嘅選民打爆。馬斯克大動作介入，惹起民主黨、學者同監督組織震驚，甚至部分共和黨人都話完全冇諗過馬斯克會咁樣插手。

眼下美國政局陷入混亂，原本有共識嘅法案突然泡湯，如果喺當地時間21號凌晨零點零一分前冇新方案過關，聯邦政府就要停擺，勢將成為2018年12月以嚟再度政府「關門」。上一次停擺就喺特朗普首次任期中發生，搞足35日，創下美國史上最長紀錄。

《華盛頓郵報》指出，馬斯克從未當選過公職，以至今年7月特朗普遇上暗殺未遂事件前，都冇公開支持過佢。但依家，竟已成為特朗普身邊舉足輕重嘅人物，影響準政府政策。

現時美國社交媒體已經瘋傳特朗普總統同馬斯克總統（President Musk）共治嘅話題批評者索性幫馬斯克取個新稱號「影子美國總統」。加州民主黨聯邦眾議員洛福格林（Zoe Lofgren）放出一張AI合成圖片，諷刺馬斯克似正操縱「特朗普木偶」；佛州民主黨聯邦眾議員佛羅斯特（Maxwell Frost）更諷刺地表示：「一個冇選票嘅富豪，被共和黨加冕為共同總統。」

夏威夷州民主黨聯邦參議員廣野慶子（Mazie Keiko Hirono）直言：「依家突然多咗個億萬富豪加入決策，但成個國家係由佢話事？等於要同兩個領袖周旋。如果將嚟真係咁樣拍板政策，諗起就令人心寒！」《I》