美國參議院一份最新報告大爆猛料，指中國已經喺全球建立咗一條龐大嘅走私晶片網絡，獲取美國高端技術。早前美國科技媒體The Information亦追查發現，中國買家透過中介商，經馬來西亞同香港將晶片轉運去中國內地，手法之狡猾，甚至會扮租用數據中心安裝同啟動伺服器，好似做戲咁，瞞過檢查，最終成功將貨品流入中國內地。

美國參議院常設調查小組委員會（Permanent Subcommittee on Investigations）喺本月18號公布報告，指雖然美國政府一直以嚟對先進半導體實施嚴格出口管制，但成效都唔算理想，美國政府面對人手不足、預算有限等困局。

據The Information引述消息人士透露，美國商務部最近要求AI晶片龍頭輝達（Nvidia）自行調查過去一年內產品點樣「走後門」流入中國。為咗搵出條數，輝達已經搵下游夥伴，包括伺服器大廠美超微（Supermicro）同戴爾科技（Dell Technologies）等公司，仔細審視佢哋東南亞客戶背景，務求搞清楚貨品究竟點樣流失。

The Information早前一篇深入追蹤報道已踢爆，受美國出口管制嘅先進晶片點樣經由馬來西亞、香港等樞紐轉運，再走私入中國，成為一門極具利益嘅大生意。報道訪問多名晶片中介商、輝達授權分銷商以及美國商務部人員，並檢視大量採購文件。

報道指，有間中國電器公司數個月前訂購300台伺服器，每部機都搭載8粒輝達H100晶片，佢哋並非向輝達授權分銷商直接落單，而係經一間馬來西亞晶片中介攞貨。嗰個中介安排中國買家喺馬來西亞註冊一間空殼公司，藉此同中國母公司撇清關係，同時幫手整公司網站同電郵，打造一個有頭有面嘅假殼公司。

呢張訂單價值1.2億美元，因為涉及金額巨大，輝達方面派人親自落場檢查設備。中介嗰邊就「做騷」，喺馬來西亞新山（Johor Bahru）一個備用數據中心租用場地，先安裝同啟動伺服器比輝達人員檢視。當輝達職員驗完機離開之後，伺服器就快手經香港送入中國內地，完全冇留底。

報道指出，晶片走私已經唔再係以前嗰種少量夾帶，而係組織嚴謹、環環相扣嘅跨國大生意。自從半導體受美國限制出口後，整個手法變得更加複雜。亞洲有唔少細型公司專責策劃，成立空殼公司、或者將晶片藏喺裝滿機械或其他雜貨嘅貨車入面，由此賺取龐大利潤，一單生意賺過億美元都唔出奇。

中國買家除透過「灰色市場」入貨外，亦會喺海外租用Google或Microsoft等公司嘅數據中心伺服器攞晶片，因為雲端運算服務本身唔受到美國出口管制約束。

輝達方面強調，公司要求客戶同合作夥伴嚴格遵從出口管制規定。不過現實就係，當大型分銷商再分貨比中小型分銷商，中小型分銷商再分畀更細嘅分銷商，條供應鏈就變得複雜到一個地步，難以完全掌控。中介商仲透露，要搞掂所需數量晶片，佢哋時常要同更細嘅分銷商「拆貨」攞料。

The Information今年5月曾親身去一個自稱Mike嘅中介商位於香港嘅倉庫睇實貨，見到入面儲存咗600台戴爾科技同美超微生產、每台配有8顆H100晶片嘅伺服器，總共有4,800顆H100，市值約1.8億美元。

Mike話佢以約2.3億美元價格賣比中國買家，利潤可觀。佢自誇同戴爾科技同美超微等伺服器廠同分銷商代表關係唔錯，先可以攞到咁多受到美國政府管制嘅晶片。喺Mike嗰度，伺服器已經由戴爾科技或美超微原裝包裝，換成貼有其他標籤嘅紙箱。喺海關申報表上，佢會因應當時夾雜晶片嘅貨物類型，將裝箱物品申報成其他名目，蒙混過關。

報道最後指，走私管道之繁複，已經令美國出口管制成效受到外界質疑。美國商務部亦已將部分捲入呢類走私活動嘅中國公司列入實體清單，禁止美企同佢哋做生意。《I》