中原地產主席施永青繼昨（19日）撰文指中國政府必須承認政策失誤，令人民對未來恢復信心後，今日又在旗下網媒《AM730》以「中國的工資佔GDP比重嚴重偏低」為標題撰文，指中國人民工資過低點有可能做到習近平所講嘅經濟「內循環」，佢認為必須停止一帶一路大撒幣同埋一昧搞基建等行為，讓人民收入翻倍先能救到中國經濟。

施永青喺文中表示，中國一直想透過加強經濟內循環，嚟化解美國加徵關稅所帶嚟嘅負面影響，但發覺中國嘅內需實在好難拉動得起。除咗中國人一向危機意識重，想積穀防饑之外，係因為現行嘅社會分配模式都冇辦法令廣大受薪階層獲得合理嘅個人收入，本地服務業增長速度亦都相對不足。

施永青指出，一般發達國家，工資佔GDP嘅比例可以去到50%以上，但中國卻得大約15%上下。咁大嘅差距，令發達國家嘅人民唔單止有收入應付溫飽，仲可以追求更多提升生活質素嘅服務，令經濟唔使過度依賴製造業同出口，有更多內循環空間。

施永青認為，而家中國需要進行第二次大解放，令老百姓可以分得更多勞動成果。如果能夠令工資佔GDP嘅比例由15%提升到30%，咁樣中國嘅內需一定會大幅增加，經濟內循環好快就可以發展起嚟。

至於有人或會憂慮，錢從何來？施永青認為，其實唔使擔心，因為中國嘅基建已經超額完成，未來十年可以暫緩呢方面投入，國家可以因此減稅，令企業同個人有更多資源去發展經濟同作個人消費。

施永青又話，需要「調整」一帶一路嘅方式，減少無償支援，多啲商業考慮。國家層面行為可以收縮，民間嘅行為要多加鼓勵。眼前，中國自己都飽受壓力，援外開支可以大幅縮減。

施永青建議，中國必須研究點解工資佔GDP比重可以跌到咁低，並搵出可行途徑去改變呢種狀況，否則「經濟內循環就好難發展」，並批評中國工資佔GDP比例之所以落到咁低嘅水平，係因中國將收入用嚟做基建、鞏固重工業、發展太空探索同研究國防科技等，「結果令個人需要往往被忽視」。《I》