昨（19日）係《中英聯合聲明》簽署40周年，香港早已不再享有北京當初承諾嘅種種權利。中國近年公然否認《中英聯合聲明》效力，稱其為「歷史文件」，對中國政府無任何約束力。《自由亞洲電台》訪問前立法會議員劉慧卿，佢直言香港自由越來越少，北京當年嘅承諾並無保證，各人只能盡力做。

1984年12月19日，中國時任總理趙紫陽同英國首相戴卓爾夫人喺北京簽署《中英聯合聲明》，清楚訂明中國喺1997年7月1日對香港恢復行使主權後，將按照「一國兩制」原則，確保香港資本主義制度同生活方式「50年不變」。同時文件強調要保障香港居民嘅人身自由、言論、出版、集會、結社、宗教信仰等各項權利，並喺香港《基本法》中列明。

轉眼《中英聯合聲明》簽署40年，劉慧卿慨嘆，香港嘅自由愈嚟愈少，縮減得好嚴重，唔止《中英聯合聲明》，就算《基本法》，北京嘅承諾好多都唔能夠實質保障。佢又話，今時今日仲可以喺香港到法院聽審、探監同接受外國傳媒訪問，但將來情況可能更壞，「沒有保證，盡力啦大家。」

北京當局拒絕承認《中英聯合聲明》效力，可以追溯到2014年。當年香港爆發「雨傘運動」，英國下議院外交事務委員會原定喺當年底派員嚟港考察香港政治改革同港英關係等議題，但北京拒絕發放簽證。

被拒入境嘅英國下議院外交事務委員會主席奧威特（Richard Ottaway）其後透露，中國官員認為《中英聯合聲明》已經失效。中國外交部隨後重申，英國對回歸後嘅香港「無主權、無治權、無監督權」，唔存在所謂道義責任。

去到香港主權移交20周年前夕，中國首次正式否定《中英聯合聲明》嘅效力。2017年6月29日，時任英國外交大臣約翰遜（Boris Johnson）表示，希望香港喺全面民主同有問責嘅政府制度上取得更大進展，並重申英國當年喺《中英聯合聲明》內對香港所作嘅承諾同20年前一樣堅定。

但翌日中國外交部隨即表示，《中英聯合聲明》作為歷史文件，已經冇任何現實意義，對中央政府管理香港特區冇任何約束力。英國外交部即時回應，指《中英聯合聲明》係有法律約束力嘅條約，至今仍然生效。

自1997年後，英國政府已經四度譴責中國政府違反《中英聯合聲明》，其中兩次更定性為「嚴重違反」（serious breach），而現時英國官方立場係中方持續唔遵守（ongoing non-compliance）該聲明。《I》