《美國之音》報導，英國內政部喺今年9月宣布擴大電子旅遊許可（ETA）計劃，要求由出年1月8日起，所有來自香港嘅旅客喺入境英國前必須申請ETA，每人收費10英鎊或約13美元。雖然對於大部分旅客影響不大，但對於曾因香港政治事件被判囚超過12個月嘅人士，可能會成為一個重大障礙，隨時令佢哋無法探親或申請政治庇護。

港人案例：抗爭者被拒簽難再團聚

陳先生曾喺2019年香港抗爭運動中被控暴動罪成，判囚超過兩年。佢接受《美國之音》訪問時透露，喺佢被捕時，香港警方曾威脅若佢唔合作，就會拘捕佢嘅家人，迫使佢嘅家人移民英國。

陳先生持有BN(O)護照，出獄後曾嘗試申請BN(O)簽證移民英國，但因刑期超過12個月而遭內政部拒絕。雖然佢曾以旅客身份成功入境英國探親，但隨著ETA計劃生效，佢非常擔心未來可能被拒絕入境。

陳先生表示：「太太話自己一個人照顧唔到兒子，佢講到兒子成日掛住我，甚至有情緒問題，令我非常內疚，呢幾年真係冇好好陪伴過佢。」佢認為，最壞嘅情況下，或需要喺入境關口申請政治庇護，但此舉將令佢無法再返回香港，因為父母仍留喺香港，這種兩難局面令佢非常痛苦。

另一名曾參與抗爭運動嘅阿豪同樣被判囚超過12個月，佢出獄後先嘗試申請美國簽證但被拒，後來申請加拿大ETA時，因未如實申報被拒簽記錄而被要求補交資料，最終亦未能成功入境。阿豪最後選擇到英國，以家人嘅BN(O)身份申請簽證，但再次因案底被拒，最終只能申請政治庇護。

阿豪直言，ETA制度生效後，香港抗爭者可能再無辦法前往英國，提醒其他出獄嘅抗爭者必須謹慎選擇離港嘅第一站。「如果如實申報有案底，簽證被拒，申請政治庇護嘅機會可能會完全失去；但如果暪報資料，即使能夠入境，之後申請入籍都有可能受到影響。」

佢批評英國政府推行ETA嘅做法：「如果英國真係唔想支持，就直接講清楚，一方面講支持，另一方面又設障礙，根本係非常矛盾。」

港人組織：ETA係變相簽證

在英港人組織「蘇格蘭香港人」創辦人郭子健發起聯署，要求英國政府維持現行免簽政策，持有BN(O)護照嘅港人毋須申請ETA。截至12月18日，已有超過10,300人聯署，英國政府需就此回應。郭子健批評，ETA係變相簽證，削弱咗BN(O)持有人原本已經有限嘅權利，亦違背咗英國喺《香港國安法》生效後對港人作出嘅歷史承諾。

佢表示：「BN(O)護照持有人本身已經冇咗喺英國定居嘅權利，而ETA令佢哋進一步喪失自由進出嘅能力，根本唔符合英國國籍法同國際法。」

英國上議院議員奧爾頓勳爵（Lord Alton）喺12月初向政府提問，要求評估ETA政策對BN(O)持有人可能帶嚟嘅影響。代表政府嘅上議院議員漢森爵士（Lord Hanson of Flint）喺17日回應稱，ETA係為咗加強英國邊境安全，同時防止對英國構成威脅嘅人士入境，但冇正面回應ETA對只有BN(O)護照但無簽證人士嘅影響。

「港援」（Hong Kong Aid）成員周先生指出，英國本應係最能支援香港抗爭者嘅地方，但ETA政策可能令急需離開香港嘅人完全無路可走。「原本英國係最適合幫助香港人嘅地方，但如果現時香港人唔能夠再去英國，咁真係好令人擔憂。」

港人組織認為，英國政府需要重新審視ETA政策，確保急需庇護嘅港人能夠得到應有嘅支援，而唔係被擋喺英國門外，進一步削弱英國對香港抗爭者嘅承諾。《I》