中原地產主席施永青今（19日）喺旗下網媒《AM730》以「中國的內需為何拉動不易」為標題發表評論，直言中國政府必須要讓人民知道，之前邊啲政策出錯，先可以令到人民對未來恢復信心。

文章指出，為咗應對美國將進一步對中國輸美嘅產品增徵關稅，中國決心以刺激內需嘅方法嚟推動經濟內循環。咁樣，就可以減少出口受制對經濟所造成嘅負面影響。為此，中國已經多次減息降準，以寬鬆嘅貨幣政策去鼓勵人民消費。近日，唔少內地銀行都有推出各式「消費貸」產品，利率低到可以同有抵押嘅樓宇按揭媲美，審批要求都非常寬鬆。

但即使喺政府嘅大力呼籲之下，民間對消費仍然唔夠積極。政府嘅優惠政策反而誘發咗各式各樣嘅「尋租」活動，企圖透過虛假嘅消費，騙取銀行嘅優惠，用喺政府原先唔打算鼓勵嘅活動上。

施永青認為，中國嘅內需之所以不易拉動，係因為人哋對經濟嘅前景仍然唔太樂觀，擔心往後嘅日子會更加難過，所以傾向留多啲現金喺手，以備不時之需。而要扭轉民間咁樣嘅顧慮，政府必須把中國嘅實際處境如實告訴人民，並提出一系列嘅應對方案。

佢認為，如果中國人民覺得政府嘅斷症無錯（人民未必一定知道對錯，但可以察覺到政府對國家處境嘅判斷係咪同佢哋嘅感受一致），又覺得政府提出嘅應對策略已經對症下藥，咁人民就會對前景恢復信心。只有咁樣，人民先願意把手上嘅積蓄拿出嚟消費。

施永青又指，靠拿之前嘅積蓄嚟消費並非長遠之計，因為積蓄總有一日會用曬。當人哋發現手上嘅積蓄愈嚟愈少時，自然會勒緊褲頭，少消費。因此，關鍵問題係要令人民對收入增長有信心；否則，即使有消費券派，都只能起一時之效，好快就會無以為繼。

佢又話，要增加國民收入，談何容易，邊個政府唔想經濟增長，人民收入日增？問題係要做完先知道係咪有效果。通常，若要肯定某一種做法係正確嘅，事前係好難判斷嘅。但要確定某啲做法係錯誤嘅，就相對容易。因此，喺政府未能說清楚現時嘅政策為何一定正確之前，政府可以讓人民知道，之前邊啲政策出咗差錯，政府已經著手糾偏。能做到呢一點，已經可以令人民對未來恢復信心。

施永青舉例指，正如喺改革開放初期，鄧小平亦只能告訴人民，佢係摸住石頭過河，並非每一種嘗試都係正確嘅。人民之所以願意跟隨佢，係因為佢能指出，文革時期國家犯咗邊啲錯誤，邊啲地方係倒行逆施，佢打算點樣撥亂反正。人民支持鄧小平，係因為佢唔再以階級鬥爭為綱，而係把注意力集中喺經濟建設上。

施永青強調，中國人民樂於見到，政府已經察覺純計劃經濟嘅不足，支持政府引入市場機制，並開放畀民企一齊參與經濟發展，有容許少數人先富起嚟。人民亦支持政府改變閉關鎖國嘅政策，開放門戶同國際增加交往。人民當時之所以對前景充滿信心，係因為見到政府已經知道問題出喺邊度，並已經著手去糾正錯誤。《I》