歐盟喺本周一（16日）正式宣布對俄羅斯推出第15輪制裁，名單首次納入6間中國公司同一名中國商人，其中兩間公司更係喺香港註冊。

被點名嘅其中一名中國商人係李曉翠（Sophia Li Xiaocui，音譯），佢被指控透過香港公司「寰宇智芯國際貿易」（ARCLM International Trading Co）同河北宏強機械（Shijiazhuang Honqiang Technology），協助俄羅斯公司Unimatik採購受出口管制嘅歐洲商品。歐盟指出，Unimatik係俄羅斯「軍工複合體」嘅重要參與者，今次將李曉翠同相關公司拉入黑名單，係要針對中國企業暗助俄軍嘅行為嚴正警告。

另一間受制裁嘅香港公司「亞太鏈接有限公司」（Asia Pacific Links）同樣備受關注。根據歐盟嘅調查，該公司負責人係俄羅斯公民Anton Trofimov，該公司被指係俄羅斯自入侵烏克蘭以嚟，最大嘅微電子元件供應商，為俄軍提供大量敏感零件。

此外，深圳嘅巨航航空科技、紅兔矢量實業同廈門嘅林巴賀航空發動機亦榜上有名。歐盟指，呢幾間公司負責向俄軍提供製造Garpiya-3長程攻擊性無人機所需嘅零部件同組件，等同直接參與俄羅斯對烏克蘭嘅軍事行動。

除咗針對中國實體同個人，歐盟今次亦將矛頭指向北韓，因應北韓派兵到烏克蘭協助俄軍，制裁北韓國防部長努光鐵同人民軍副總參謀長金永福兩名高階官員，直指佢哋係加劇戰事嘅幕後推手。

歐盟對外政策高級代表兼委員會副主席卡拉斯（Kaja Kallas）喺記者會上表示，今次制裁係要清晰告訴中國，如果協助俄羅斯打仗，就要付出代價，強調歐盟各國立場團結一致，絕唔會容忍中國喺背後支持俄軍。

卡拉斯亦提到，烏克蘭政府指控中國提供衛星資訊，協助俄羅斯無人機進行攻擊，但歐盟尚未掌握確實證據，未來會繼續密切觀察中國嘅行動，並視情況再進一步跟進。

分析指出，今次制裁不再單純針對「白手套」角色，而係直接鎖定向俄軍提供實質零件嘅生產商，反映歐盟對中國「挺俄」嘅回應逐步升級。尤其係兩間香港公司被點名，進一步令香港企業喺國際政治角力中備受壓力。

自2022年俄羅斯全面入侵烏克蘭以嚟，歐盟已多次推出制裁措施，今次係第15輪方案。之前，歐盟針對中國嘅制裁主要集中喺代購角色，而今次直接制裁無人機零件製造商，反映歐盟喺烏克蘭戰爭問題上，對中國態度愈趨強硬。《I》