特首李家超今天話，佢上週到北京向國家主席習近平述職時，習近平要求港府同香港各界要積極對接「國家戰略」。整場訪問，李家超三句不離習近平，擦鞋擦到足。

李家超表示，佢喺述職期間有四大體會：第一，習近平充分肯定佢同特區政府過去一年嘅工作，讚揚特區政府「擔當作為、務實進取」；第二，中央重申會全面準確貫徹「一國兩制」方針，堅持香港繁榮穩定發展；第三，認同香港已進入穩定發展嘅良好態勢；第四，習近平指出政府要團結社會各界，積極對接國家戰略，銳意改革、創新突破，塑造經濟發展嘅新動能同新優勢。

李家超引述習近平指，國家係香港最強大嘅後盾、最大嘅機遇，港府同社會各界必須善用國家戰略嘅支援，喺「一國兩制」嘅制度優勢下，推動香港創新發展。佢強調，《施政報告》已經提出一系列政策措施，包括鞏固香港國際金融、航運同貿易中心地位，發展創新科技中心同新質生產力，深化粵港澳大灣區合作，推動「一帶一路」經貿網絡建設，打造國際黃金交易市場同大宗商品交易生態圈等，為香港建立新嘅經濟動能同競爭優勢。

佢指出，社會各界普遍支持《施政報告》嘅方向同政策，政府會帶領各方齊心協力，推動經濟改革同發展，喺創新創造中實現香港繁榮穩定。

談到財政預算案，李家超表示，政府會透過開源節流，增加經濟活動同本地生產總值，提升政府收入。佢指財政司司長陳茂波已展開諮詢工作，會積極收集社會意見，制定有效措施，增強香港經濟增長動力。

李家超又指出，本地生產總值主要靠投資、消費同出口。政府會繼續確保每年有約900億港元嘅基建投資，為經濟增長打好基礎；而私人投資方面，由於市場存在唔少不確定性，部分企業態度較為審慎。

消費方面，李家超表示，自深圳恢復「一簽多行」之後，內地旅客訪港數字顯著上升，特別係週末期間，人流增加兩至三成，市面氣氛明顯好轉，帶動唔少行業嘅營業額增長。佢樂觀預期，聖誕同新年期間旅客數字會進一步提升，進一步刺激本地消費。佢亦提醒業界要掌握網購發展機遇，彌補實體經濟增長放緩嘅壓力。

面對外界有聲音要求縮減公務員編制或凍薪，李家超回應指，政府歡迎所有建議，並會審慎考慮背後嘅理念同數據，務求平衡社會整體利益。佢強調，港府會全面研究各方意見，適當調整政策方向，確保公共資源有效運用。

李家超最後強調，喺習近平指引嘅大方向之下，港府會團結社會各界，透過改革同創新，推動香港由穩定邁向繁榮，為香港打造更光明嘅未來。《I》