《美國之音》報導，中國駐肯尼亞大使館喺奈洛比為肯尼亞國家廣播公司（KBC）嘅記者舉辦培訓班，聲稱目標係要提升新聞專業性同誠信，但外界質疑此舉實際上係想影響當地媒體，為中國塑造更正面嘅形象。令人諷刺嘅係，中國喺全球新聞自由度排名幾乎係包尾嘅水平。

今次培訓班吸引大約70名肯尼亞國家廣播公司嘅記者同編輯參加，內容涵蓋多個新聞主題。喺開幕儀式上，中國駐肯尼亞大使館公使銜參贊張執中大談新聞工作嘅重要性，形容記者係媒體嘅核心，仲話新聞工作者肩負住匯聚資訊、引領國家走向「正確方向」嘅重任。

然而，有關培訓引起國際關注，唔少評論認為呢種合作係中國政府滲透非洲媒體嘅手段之一。獨立記者權益組織指出，中國慣常通過提供資金、贊助活動同培訓機會，換取對中國有利嘅報導，藉此美化自身形象、淡化負面消息。

報導指出，中國係全球新聞審查最嚴格嘅國家之一，利用審查、監控同法律威脅等手段打壓言論自由。根據今年新聞自由指數，中國喺全球180個國家入面排名第172位，僅高於少數極權國家。

肯尼亞國家廣播公司總編輯馬伊納（Simon Maina）承認，資源有限下，接受中國幫助係「無可避免」，但佢強調，編輯室嘅新聞決策並唔會受到中國嘅干預，亦唔會效法中國喺本土嘅操作模式。他話：「我哋嘅編輯政策依然獨立有效，唔會因為呢啲合作而受到影響。」

不過，國際記者聯盟2021年一份報告就指出，中國政府針對非洲等開發中國家記者，透過經濟同技術支援來加強影響力，因為中國喺呢啲地區擁有重大嘅經濟利益。例如基建同「一帶一路」計劃，正係中國投資非洲嘅重點項目。

報告顯示，大部分非洲受訪者對同中國合作持正面態度，特別係喺基礎設施落後嘅地區，媒體合作被視為資源提升嘅重要途徑。不過，有專家指出，中國媒體滲透喺非洲嘅效果未如理想。

肯尼亞外交政策教授米丹巴（Naoh Midamba）分析，由於語言障礙，中國嘅訊息仲未能夠真正進入非洲基層社區同農村地區。「非洲人依然唔識中文，而中國嘅宣傳內容未能打動佢哋，媒體依然同西方保持一致。」

中國目前係肯尼亞最大嘅貿易夥伴，但雙邊貿易長期處於不平衡狀態。唔少經濟學家批評，肯尼亞參與中國「一帶一路」項目後，陷入所謂嘅「債務陷阱」，大批基建項目雖然落成，但當地政府面臨龐大嘅債務壓力，經濟發展亦未見明顯改善。《I》