香港現時公務員空缺率高達10%，即接近2萬個職位懸空。有議員關注政府境外招募年輕公務員嘅成效，公務員事務局局長楊何蓓茵回應，部分內地港人畢業生因英文水平未達標，未能成功入職。政府已向內地高校提出增加英語課程，協助畢業生提升語言能力應對就業挑戰。

立法會公務員及資助機構員工事務委員會今日開會討論如何吸引年輕人加入公務員隊伍。金融界議員陳振英擔心人手不足會影響政府部門接收同培育實習生嘅能力。楊何蓓茵坦言，部門即使人手緊缺，都要「咬緊牙關」接收實習生，否則人手問題會形成惡性循環。

楊何蓓茵透露，政府每年新聘約1萬名公務員，並正採取多管齊下嘅方針吸引青年加入，例如喺本地三間大學舉辦「政府職位招聘展覽」。她補充，政府及公營機構於2023至2024年度聘請咗約4,000名實習生，來年計劃再喺80多個決策局同部門提供相若名額，讓青年人了解相關職責同運作。

選委界議員管浩鳴認為，香港目前經濟不景，應考慮縮減公務員編制，甚至凍結薪金，以減輕財政壓力。佢指出，2013年公務員編制約為16萬人，如今已升至19萬，建議先檢視部分政府服務嘅收費，確保收回成本，同時考慮開徵銷售稅，以穩定政府收入。佢舉例指英國、日本都徵收銷售稅，對本港經濟嘅影響未必如想像中大。

不過，管浩鳴亦直言，社褔界已經面臨龐大壓力，建議不要再削減相關開支，因為涉及人數眾多，若再減，恐怕無法應付市民需求。

行會成員陳健波指出，政府需面對財政挑戰，建議「開源節流」同時並行，並提出利用人工智能提升行政效率，減少不必要開支。佢強調，政府應優先打擊濫用福利情況，再考慮調整公務員薪金加幅或凍薪。佢亦提議吸引更多中國企業來港上市，振興本地股票市場，同時鼓勵「勾地」，增加賣地收入。

陳健波話，搞活經濟至關重要，中美關係緊張下，內地公司屢受美國壓制，香港可成為其上市融資嘅最佳地點。此外，佢認為提升土地成交量可為政府帶來穩定收入，從而應對當前嘅財政壓力。

經濟學者李兆波認為，政府應從縮減高級公務員薪酬入手，對表現欠佳者作出調整，而避免削減中低級公務員薪酬，以免影響士氣。佢建議減省冗長嘅行政程序，以降低政府運作成本。

但李兆波亦坦言，現時財赤嚴重，開源空間有限，短期內即使增加稅項，效果亦未必明顯。佢建議政府趁機檢討現行稅制，為未來制定更合理嘅財政政策。《I》