俄烏戰爭持續膠著，北韓派兵協助俄羅斯作戰，不過呢批北韓士兵喺戰場上就鬧出意外。《基輔獨立報》引述烏克蘭軍事情報機構（HUR）消息指，一支部署喺俄羅斯庫爾斯克州（Kursk）嘅北韓軍隊，早前疑因語言障礙，錯誤地向俄軍「車臣艾哈邁特部隊」（Chechen Akhmat unit）開火，導致8名俄軍士兵死亡。

HUR喺Telegram頻道披露，北韓士兵與俄軍嘅語言不通，成為戰場上難以克服嘅障礙，最終釀成悲劇。烏克蘭情報顯示，至今已有200名俄羅斯同北韓士兵喺俄烏戰場上喪命。雖然事件真實性無法完全核實，但消息喺戰場內外引起軒然大波。

消息指，目前有超過1萬名北韓士兵集結喺庫爾斯克州，準備參與針對烏克蘭軍嘅行動。HUR透露，今年11月，北韓士兵首次與烏軍喺該地正面交火，雖然佢哋暫時未被派往其他前線地區，但未來情況或會改變。

烏克蘭當地媒體報導，近期數十名北韓士兵喺庫爾斯克州陣亡，部分遺體相片與影片被公開。烏克蘭軍第414攻擊無人機聯隊早前喺Telegram頻道分享一段影片，畫面顯示約20具遺體排放喺雪地上，遺體嘅面部被圍巾同積雪覆蓋，估計已經擺放數小時。

片中可見，一輛疑似俄軍嘅卡車前往現場，準備運走遺體，但因發現烏軍無人機，隨即匆忙駛離。頻道指出，每次突擊結束後，都會有北韓士兵駕車將遺體運走。

烏克蘭總統澤連斯基表示，俄羅斯已派遣大量北韓士兵，目標係將烏軍逐出庫爾斯克州。烏克蘭司令部更聲稱，喺近期行動中活捉部分北韓士兵，但消息暫未全面公開。有烏克蘭軍事博主透露，司令部掌握影片顯示多具北韓士兵遺體排列雪地，顯示北韓參戰嘅實質證據。

北大西洋公約組織（NATO）秘書長、荷蘭前首相呂特（Mark Rutte）喺4日表示，據佢所知，俄羅斯係以提供核武同飛彈技術作為代價，換取北韓派兵協助烏俄戰事。

早前嘅北約外長會議上，烏克蘭重申咗佢哋想加入北約嚟作為國防「真正保證」嘅立場，但由於特朗普即將重返白宮，北約各國外長都唔願喺此時處理呢個棘手問題。

喺烏克蘭外長同北約外長嘅晚宴結束後，立陶宛外交部長藍斯柏吉斯（Gabrielius Landsbergis）就對媒體透露，冇乜進展。《I》