以色列政府近日再度掀起中東局勢緊張局面，總理內塔尼亞胡宣布推行總值1,100萬美元嘅計劃，要喺接壤敘利亞嘅戈蘭高地擴大殖民區，目標係將當地居住人口翻倍。阿拉伯國家對以色列「吞併擴張」行徑表達強烈不滿。

以色列總理內塔尼亞胡話，喺敘利亞政權倒台後，戈蘭高地嘅戰略價值再一次顯得重要。以色列已經派兵進入戈蘭高地嘅緩衝區，並聲稱係為咗應對來自敘利亞嘅潛在威脅，防止恐怖組織喺邊境地區坐大。佢話，強化戈蘭高地係強化以色列國力，計劃仲包括改進當地教育系統、發展可再生能源基建，吸引新居民融入。

根據計劃，超過4,000萬新謝克爾（約1,100萬美元）會被用於擴建殖民區。現時，戈蘭高地已有約31,000名以色列定居者，居住喺數十個定居點內，而呢啲定居點被國際社會認定為非法。

內塔尼亞胡嘅決定並唔止於推進殖民計劃。上周，以色列軍隊進入敘利亞境內嘅緩衝區及幾個戰略據點，仲喺俯瞰敘利亞首都大馬士革嘅黑門山部署部隊。以色列國防部長卡茲形容呢個位置對以色列安全至關重要，並指以軍已為黑門山嘅冬季駐紮進行特別準備。

以色列仲透過數百次空襲，摧毀敘利亞軍隊遺留嘅武器庫同彈藥庫，防止裝備落入敵對勢力手中。路透社報導，卡茲話，以軍會喺敘利亞局勢穩定之前，持續駐守黑門山。

沙特、卡達阿聯酋、法國等批評以色列嘅行動，指違反1973年以阿戰爭後簽署嘅《分離部隊協議》。阿聯酋直指以色列係刻意擴大佔領範圍，加深地區矛盾。但美國則表態支持，稱以色列此舉係必要嘅自衛措施。

半島電視台分析指，內塔尼亞胡嘅行動與佢喺被占西岸嘅政策如出一轍：透過土地掠奪、擴建殖民區，令佔領永久化。內塔尼亞胡正利用目前嘅時機推進更多定居活動，加強以色列喺地區內嘅主導地位。

2017年，美國前總統特朗普曾正式承認以色列對戈蘭高地主權，成為唯一承認以色列此舉嘅國家。而近日，內塔尼亞胡又再與特朗普通話，兩人討論咗敘利亞局勢同加沙戰事。內塔尼亞胡形容兩人嘅通話非常友好、溫暖同重要，亦談及以色列必須喺加沙取得完全勝利，以及救回人質嘅努力。《I》