英國工黨上台後走向親中路線，聲稱對中國採取「務實」同「穩定」嘅外交政策，近期多位高階官員陸續訪華，而能源大臣文立彬亦可望於出年3月接棒前往中國，進一步推動英中能源對話嘅重啟。消息由政治新聞網站 Politico 援引兩名知情人士報導，透露英國工黨政府正喺氣候變遷同綠色供應鏈議題上尋求與中國建立更加緊密嘅合作。

英國首相施紀賢領導嘅工黨自今年7月上台後，已多次強調希望同中國保持穩定嘅互動關係。喺11月巴西舉行嘅G20峰會期間，施紀賢曾向中國國家主席習近平提議，明年喺倫敦或者北京舉行雙邊高階正式會談。佢喺12月初嘅年度外交政策演講中再次強調，英國應積極準備與中國展開更多對話，特別喺氣候變遷同能源合作等領域。

外交大臣林德偉喺10月已率先訪華，而財政大臣李韻晴亦已確認將於出年1月中旬訪中。而據最新消息，能源大臣文立彬則計劃喺出年3月出訪，進一步推進英中能源對話嘅重啟工作。

英中能源對話始於2010年，但自保守黨執政以來，相關會談已有數年未舉行。文立彬此行被認為係為咗促成雙邊合作重啟，特別係針對可再生能源供應鏈，例如電動車、太陽能板等領域展開深入討論。英國能源安全暨淨零排放部未對此消息作出評論，但消息人士稱，此舉係工黨政府氣候議程嘅重要部分。

然而，保守黨對工黨潔淨能源政策提出強烈批評，指其可能令英國過度依賴中國進口。工黨內部亦有聲音要求政府更嚴格監管自中國進口太陽能板及相關零件，避免涉及新疆地區嘅強迫勞動問題。

英國如何平衡對中合作同與美國嘅「特殊關係」亦備受關注。隨住美國新一屆特朗普政府可能喺經貿領域對中國採取更強硬態度，英國工黨政府將面臨艱難抉擇，既要維持與美國嘅深厚聯繫，又要確保喺對華合作中獲取實質利益。

首相施紀賢喺G20峰會曾向習近平表示，雙方應盡可能避免意外，為雙邊關係降溫。同時，商業暨貿易大臣韋諾韜喺國會答詢時亦指出，英國必須最大限度喺美國、歐盟同中國呢三大市場中獲取利益，呢點係英國未來國家定位嘅核心挑戰。《I》