中國男子足球隊前主教練李鐵，因涉嫌受賄、行賄等五宗罪，被湖北咸寧市中級人民法院宣判監禁20年。根據檢方指控，李鐵涉案金額總數超過1.19億元人民幣，案件涉及廣泛，牽連眾多，喺中國足壇掀起一陣驚濤駭浪。

現年47歲嘅李鐵，遼寧瀋陽出生，曾係中國國家足球隊嘅代表人物之一，喺2002年韓日世界盃上出戰，並曾效力英超愛華頓，成為當時內地球迷心目中嘅偶像。退役後，李鐵投身執教，曾任廣州恆大助教、河北華夏幸福及武漢卓爾主教練，喺2020年接任國足主教練。不過，呢位昔日英雄喺退役後未能保持清白，反而深陷貪腐泥沼，成為今日足壇醜聞嘅中心人物。

法院判決指出，李鐵喺多次轉會交易、比賽操控中非法收受及支付巨額賄款，牽涉金額巨大。喺2017年至2019年間，佢利用擔任武漢卓爾總經理及主教練嘅職權，為河北華夏幸福提供協助，非法收受人民幣2,675萬元。而喺2015年至2019年間，李鐵更涉嫌操控比賽結果，與相關球會負責人商定，以金錢賄賂方式換取「有利比賽結果」，涉案金額達3,905萬元。

除此之外，李鐵亦被揭發於2019年至2021年間，利用擔任國足選拔隊及主教練職務上嘅便利，非法收取相關人士人民幣超過5,089萬元。李鐵喺接受調查期間，亦承認曾以300萬元賄賂中國足協官員，以確保自己能夠出任國足主教練。

李鐵案並非單一事件，而係中國足球貪腐問題嘅冰山一角。央視喺今年年初播出反貪腐專題節目《持續發力縱深推進》，專門揭露中國足壇嘅嚴重問題。節目中，李鐵喺鏡頭前悔恨表示，自己係急功近利而墮入貪腐深淵，並希望以此警醒他人。然而，佢嘅悔悟並未能挽回局面，反而引發更多案件嘅曝光。

節目同時披露多名中國足協高層嘅貪腐情況，包括原足協主席陳戌源、副主席杜兆才、秘書長劉奕等，皆因涉嫌收受巨額賄款而落馬。陳戌源更因非法收受超過8,103萬元，被判處無期徒刑，剝奪政治權利終身，並沒收全部財產。此外，其他高層包括中超公司原董事長馬成全、中國足協競賽部原部長黃松等，刑期由數年至十多年不等，顯示中國足球體系內嘅貪腐問題已經深入骨髓。

隨住案件進一步發酵，中國足球界嘅多間球會亦面臨解散危機。河北華夏幸福及武漢卓爾已於去年宣告解散，而更多涉案球會可能隨時步其後塵。專家分析認為，貪腐問題已經嚴重影響咗中國足球嘅競技水平同國際聲譽，全面改革已經迫在眉睫。

中國球迷對於中國足球未來普遍感到悲觀。有評論指出，中國足球喺長期缺乏透明管理制度嘅情況下，已經形成咗一個貪腐嘅利益鏈條。即使現時掀起反貪風暴，亦未必能夠根治問題，反而可能因多間球會解散而進一步削弱中國足球嘅競爭力。《I》