政府估算2024/25財政年度綜合財政赤字將超過1,000億元，不過政府官員嘅人工就「超英趕美」。《YAHOO新聞》報道，特首李家超喺今年7月1日起，月薪已經調升至 469,495 元（年薪達 563.3 萬元），成為全球第二高薪酬嘅政府官員。羅淑佩及陳美寶兩位新任局長嘅月薪亦達 376,405 元（年薪達 451.7 萬元）。如果將特首、3位司長、3位副司長同15位局長嘅月薪加埋，港府22位高官每月嘅總薪酬達 847.5 萬元，全年薪酬總額突破 1 億港元。

根據 PoliticalSalaries.com 提供嘅全球公開數據，喺國家及地區領導人當中，李家超嘅薪酬僅次於新加坡總理黃循財。黃循財年薪高達 220萬新加坡元（約 1,277萬港元），平均每月 106 萬港元，係李家超月薪嘅 1.26 倍。

相比之下，瑞士總統艾瑪德（Viola Amherd）年薪 48.4萬瑞士法郎（約 429萬港元）排行第三；美國總統拜登年薪 40萬美元（約 312萬港元）排行第四，月薪僅約 26萬港元。以此計算，港府大多數局長嘅月薪都超越拜登，令人咋舌。

李家超以月薪 469,495 元 計，一季3個月便收入 1,408,485 元。如果以啟德新樓盤「天璽・天」約300呎單位售價 670萬港元 計算，做八成按揭，李家超一季人工便足夠支付「上車入場費」。如果轉為買奢侈品，熱門勞力士 Submariner 41mm 黑色官方售價 75,100 元，李家超每月薪酬可一次過掃 6隻。

另一方面，羅淑佩升任文化體育及旅遊局局長後月薪高達 376,405 元，追星費用自然毫無壓力。作為 MIRROR 成員陳卓賢（Ian）忠粉「Hellosss」，她以月薪計可購買 348 張價值 $1,080 嘅演唱會門票，足夠與同粉絲一齊瘋狂支持偶像。

而新任運輸及物流局局長陳美寶，以其月薪 376,405 元 計，每月足夠購買一部 Tesla Model 3（售價 $254,200），甚至可選擇更高階嘅 Model Y（售價 $316,200）。

除咗高官個人生活嘅奢侈消費外，整個港府高層嘅薪酬總額亦可輕鬆完成公司集資目標。以荃灣連鎖雞煲店「一品雞煲火鍋」為例，該公司計劃喺美國上市，發售 200萬股，每股定價 4美元至6美元（約 31.2至46.8港元），集資總額約 800萬至1,200萬美元。

如果按最高發行價計算，李家超單憑月薪就可以認購1萬股 成為「萬股雞煲戶」。而政府22位高官一年嘅薪酬總額，更足以覆蓋公司整個上市集資計劃。《I》