中共中央政治局昨（9日）召開會議，首次喺2025年定調貨幣政策為「適度寬鬆」，成為市場焦點。今次係中國自2011年以嚟首次作出類似表態，同時透露預算赤字率或會提升至4%，打破多年嚴守3%嘅框架。

會議指出，2025年宏觀政策要「積極有為」，提出要穩住樓市同股市，並推行更加積極嘅財政政策同適度寬鬆嘅貨幣政策。專家認為，呢個政策轉向主要係因為內地經濟面對多重壓力，包括需求不足、物價低迷、地產市場疲弱同地方債務問題等。

前中國人民大學經濟學院副院長王晉斌接受央視訪問時指出，政策調整反映內地經濟同國際局勢嘅變化，特別係全球經濟不穩定因素增加，令中央政府需要出招應對。

澎湃新聞引述東方金誠首席宏觀分析師王青嘅分析，指出「適度寬鬆」政策係針對有效需求不足嘅舉措，期望能穩住經濟基本盤。粵開證券則形容呢個基調轉變為「重大調整」，反映中央推動經濟持續回升、提振市場信心嘅決心。

政策消息一出，中國股市即刻有強烈反應，今早開盤全線上揚。證券股開盤漲幅達5.11%，房地產股亦上升4.76%。雖然盤中有資金逢高套現，但市場仍保持升勢。截至上午收盤，上證指數升1.58%，深證成指升2.08%，創業板指升幅達2.21%。滬深兩市總成交額突破1.5萬億元，較前日放大超過4,000億元。

消費相關類股成為市場焦點，食品加工、影視院線、網絡電商等板塊表現突出，而科技創新概念股如人形機器人、無人零售等亦受資金追捧，顯示市場對政策利好效應充滿期待。

根據東方金誠嘅預測，2025年中國人民銀行有望進一步加大降息降準力度，政策性降息幅度或達0.5個百分點，高於今年嘅0.3個百分點，同時降低融資成本，為經濟回暖提供支持。溫彬認為，資金流動性將保持充裕，有助企業同居民減少融資壓力，為市場注入活力。

雖然匯市可能會出現波動，但「適度寬鬆」嘅政策方向被視為穩定市場信心嘅關鍵。專家指出，中央政府冀望通過貨幣政策工具引導市場回暖，從而推動經濟穩步復甦。

同日，國務院總理李強喺北京釣魚台國賓館主持「1+10」對話會，與國際經濟組織領袖圍繞「凝聚發展共識，促進全球共同繁榮」主題展開討論。李強喺會上表示，當前世界經濟乏力，多邊主義受到挑戰，增加咗不確定性。

李強強調，中國係經濟全球化同多邊主義嘅堅定支持者，並引述習近平強調，要促進世界多極化同經濟全球化，進一步推動高水平對外開放。同時，他提到中國將擴大內需、推動科技創新同產業升級，加快建設全國統一大市場。《I》