美國總統當選人特朗普預計喺出年1月就職後，第一時間就會出手改變美國沿用多舊年嘅移民制度。佢針對外籍人士赴美「生育旅遊」同嬰兒自動獲得美國護照同社會安全碼等福利嘅政策，將進行全面改革。《華爾街日報》披露，特朗普移交團隊已經為相關行政命令同可能引發嘅法律訴訟作出準備。

美國憲法第14修正案喺1868年明文規定，喺美國出生或者完成歸化手續嘅人士都係美國公民。不過，特朗普早喺首任期間已經多次表明，佢認為非法移民或者旅遊簽證赴美生子嘅做法係漏洞，並曾計劃通過行政命令修改相關條例。不過，由於各種原因未能實施，今次捲土重嚟嘅特朗普已將「出生公民權」改革列為首日政績。

喺接受美國國家廣播公司（NBC）節目《會晤新聞界》（Meet the Press）訪問時，特朗普強調，必須立即終止喺美出生即獲公民權嘅做法，認為呢個制度過於荒謬，並表示會通過行政命令直接廢除。特朗普發言人李威特（Karoline Leavitt）表明，特朗普會善用一切手段落實競選承諾，全面改革移民制度。

特朗普喺競選期間已表明，非法移民問題係佢施政重點之一。佢認為，過去無證人士喺美生子後，子女可合法留美，但父母卻面臨遣返嘅局面，導致多次人道爭議，甚至觸發法律訴訟。特朗普嘅「邊境沙皇」霍曼（Tom Homan）更表示，新政策將確保無人道爭議，全家一齊遣返，杜絕漏洞。

針對外界關注嘅「生育旅遊」問題，特朗普團隊認為，外籍孕婦持旅遊簽證入境美國生子嘅行為，令其子女自動享有美國公民身份同福利，係嚴重嘅制度濫用。為此，團隊正計劃透過縮緊簽證發放條件，尤其係針對某啲國家嘅旅遊簽證制度進行改革，例如縮短簽證有效期或者限制入境停留時間。

消息指，特朗普嘅移交團隊已經擬定多份行政命令，目標係大幅減少因喺美出生而自動獲得公民權嘅情況。如果相關命令實施，非法移民或旅遊簽證持有者喺美生產嘅嬰兒將無法獲得護照、社會安全碼等公民權利。然而，呢個舉措勢必引起憲法挑戰。有憲法學者認為，特朗普嘅行政命令難以撼動修正案嘅法律地位。

特朗普嘅計劃亦引發對1898年「美國訴黃金德案」（U.S. v. Wong Kim Ark）嘅重新審視。當年，黃金德雖然喺三藩市出生，但因父母係華人而遭拒入境。最終，美國最高法院判決黃金德勝訴，確立喺美出生者即為公民嘅原則。支持特朗普政策嘅人士則認為，當年黃金德父母係合法居留，而現時無證移民問題同當時嘅情況係兩回事，唔應一概而論。《I》