《東網》報道，政府初步估算2024/25財政年度綜合財政赤字將超過1,000億元，遠高於2月底財政預算案時預計嘅481億元。身兼行政會議成員嘅立法會議員陳健波獻計，公務員減少5%人手，並善用AI取代人力。

中大商學院名譽教研學人李兆波早前公開表示，對香港經濟前景悲觀，建議公務員應考慮減薪或凍薪，甚至提出「一刀切」減薪8%至10%，認為「如果今年咁嘅情況都唔做，就好奇怪」。李兆波同時呼籲政府停止隨意增設職位，以免進一步增加財政壓力。

而議員狄志遠則進一步建議，應該優先由高級公務員開始減薪，佢認為呢個舉措除咗有象徵意義，亦可避免對政府整體服務質素構成太大影響。但佢亦提醒，減薪影響深遠，可能會牽連相關法定組織同團體，甚至影響學校運作。

保險界立法會議員兼行政會議成員陳健波喺社交平台上拍片，提出「3招將赤字變盈餘」。佢指出現時公務員團隊每年支出高達1,600億元，部分程序繁瑣、人力資源過多，建議善用人工智能及科技提升效率，並縮減冗員。佢認為，如果減少5%人手，控制薪酬加幅，每年節省數以百億計嘅開支絕非天方夜譚。

此外，陳健波亦提到，政府應加強打擊濫用福利保障，同時與國家新經濟措施配合，尋求更多節流方案。

事實上，公務員凍薪同減薪喺香港並非首次。沙士時期嘅2003年、新冠疫情期間嘅2020至2021年，政府都曾凍薪；2004至2005年，全體公務員減薪3%，而2009年高級公務員則減薪5.38%。對比近五年數據，除咗2020及2021年中低級公務員凍薪外，其餘年份公務員薪酬加幅均跑贏通脹，包括今年高中低層一致加薪3%。

有財金官員喺電台節目上解釋，因應息口高企、樓價下跌、市民置業意欲疲弱，令樓市及股票市場嘅印花稅收入下降，加上企業疫後復甦參差不齊，令政府收入大幅減少。佢強調，現時赤字情況屬周期性，政府不希望加重市民尤其中產階層嘅負擔，因此開源方面相當謹慎。

截至今年9月底，政府職位編制達193,645個，但實際人數只有174,135。2023/24年公務員薪酬同附帶福利修訂預算高達1,571億元，按年上升5.6%。2月財政預算案已提出公務員編制「零增長」，將編制控制喺2021年3月底水平以下。《I》