南韓執政黨國民力量黨黨首韓東勳今日（6日）公開表示，基於掌握可靠證據，認為總統尹錫悅需要被迅速停職，否則可能危害國家。韓東勳立場突變，令針對尹錫悅嘅彈劾案更接近過關。

韓東勳喺國會直播講話中指出，佢已掌握尹錫悅喺宣布戒嚴當晚曾下令逮捕多名主要政界人士嘅可靠證據，並警告尹錫悅若繼續留任，極端行動隨時可能重演，將南韓同人民推向危險邊緣。

佢表示：「考慮到新披露嘅事實，為咗保護大韓民國人民，我認為有必要迅速讓尹錫悅停職。」並補充道：「如果尹錫悅繼續擔任總統，大韓民國可能再面臨緊急戒嚴等極端行動。」目前唔清楚佢嘅觀點喺黨內得到幾大程度嘅認同。

韓東勳喺是否支持尹錫悅的問題上突然改變，顯示咗佢所屬政黨面臨嘅困境：如何同尹錫悅保持距離，但又唔畀政治對手藉此事大大得分。

韓東勳周四譴責咗尹錫悅嘅行為，但同時表示佢會反對彈劾，分析認為佢作為一名保守派政治家，需要考慮支持者嘅想法。不過，佢嘅盤算喺周五發生咗變化，佢話：「依家係單單考慮大韓民國及人民嘅時候」。

共同民主黨領袖李在明對韓東勳嘅表態表示歡迎，但同時表示：「佢呢番說話聽落係支持彈劾，但唔知佢之後會唔會改口話唔係咁嘅意思。」

根據韓聯社報道，最大在野黨共同民主黨喺同日召開緊急會議，警告尹錫悅或再次嘗試戒嚴，並要求所有議員做好準備應對突發情況。報道指出，尹錫悅嘅戒嚴爭議已引發國際市場動盪，韓國Kospi指數一度下跌1.8%，韓元兌美元亦顯疲態。

共同民主黨首席發言人趙承來透露，國會彈劾表決將喺7日晚間進行，原定今日進行嘅表決因說服執政黨支持彈劾而延後一天。此外，為阻止執政黨議員杯葛會議，共同民主黨決定提前對金建希獨檢法案進行表決。該法案意在調查第一夫人金建希涉嫌利益輸送嘅指控。

根據南韓憲法，彈劾案需獲得三分之二議員贊成，約200票方能通過。目前在野黨共同民主黨控制192席，只需國民力量黨嘅8名議員倒戈，便可令彈劾案過關。韓東勳嘅突然倒戈，被視為關鍵變數之一。

根據最新蓋洛普民調，尹錫悅支持率跌至16%，創上任以嚟新低，而李在明則獲29%支持，遙遙領先。若彈劾案通過，尹錫悅將立即停職，由總理韓德洙擔任臨時總統。案件最終將提交憲法法院裁決，過程可能需時數月。一旦憲法法院支持彈劾，南韓將提前舉行大選。《I》