中國媒體《新浪財經》報道，俄羅斯政府突然對中國進口傢俬滑軌配件加徵高額關稅，消息一出即喺業界掀起軒然大波。

根據俄羅斯傢俬同木材加工企業協會（AMDPR）嘅最新消息，俄羅斯海關宣布對中國進口滑軌配件重新分類，將原本0%嘅關稅激增至高達55.65%。呢項政策將對中俄傢俬貿易及俄羅斯本地市場帶來深遠影響。

俄羅斯約90%嘅傢俬進口需通過符拉迪沃斯托克（即海參崴）海關，而今次加徵關稅針對嘅正係呢度嘅進口產品。滑軌係傢俬中不可缺少嘅核心部件，喺某些產品中成本佔比甚至高達30%。大幅關稅上調意味著俄羅斯傢俬生產成本勢必急升，最終由俄羅斯消費者埋單。有專家預測，傢俬零售價格將因此平均上漲15%，而部分高端產品漲幅或更高。

AMDPR總裁亞歷山大·謝斯塔科夫（Alexander Shestakov）表示，俄羅斯並無生產滑軌嘅能力，長期依賴進口，當中大部分貨源來自中國。佢警告，呢項政策將嚴重擾亂市場秩序，部分依賴中國滑軌供應嘅企業甚至面臨破產風險，可能進一步導致行業性崩塌。

相比歐洲產品，俄羅斯對中國傢俬配件實施嘅關稅顯得尤為嚴苛。歐洲同類產品關稅僅上調10%，而中國產品卻需面對高達55.65%嘅稅率，呢種明顯嘅差別待遇引發業界廣泛不滿，質疑係針對中國供應商嘅不公平政策。

更為嚴峻嘅係，政策具備追溯性。根據新規定，自2021年起已進口嘅滑軌配件亦需補繳高額關稅，意味著早已完成嘅交易都可能因政策改變而大幅增加成本，進一步加劇企業壓力。

多間俄羅斯本地傢俬企業已向俄國工貿部遞交異議，要求降低對中國進口產品嘅稅率。《新浪財經》分析，呢項政策除咗打擊俄羅斯本地市場，亦可能損害中俄貿易關係，而俄羅斯喺國際市場上長期倚賴中國作為主要供應商。《I》