台灣《中央社》報道，總部設於英國嘅敘利亞人權瞭望台（Syrian Observatory for Human Rights）透露，自2011年內戰爆發以來，敘利亞政府軍首次失守第2大城阿勒坡（Aleppo）。反政府勢力聯盟發動閃電攻勢，令總統巴沙爾·阿薩德（Bashar al-Assad）政府遭受重挫，局勢隨即陷入緊張。

根據法新社報道，11月27日，敘利亞反政府勢力聯盟由伊斯蘭主義武裝團體沙姆解放組織（Hayat Tahrir al-Sham）主導，突襲由伊朗及俄羅斯支持嘅敘政府軍，成功攻佔阿勒坡除庫德族掌控地區外嘅大部分城區。敘利亞人權瞭望台負責人阿布杜勒·拉赫曼（Rami Abdel Rahman）表示，這次攻勢係內戰10多年來敘軍最重大嘅失利。

阿勒坡一直係敘內戰中嘅關鍵戰場，2016年敘軍曾依靠俄軍空中支援及黎巴嫩真主黨（Hezbollah）地面部隊奪回阿勒坡，但今次失守再次顯示政府軍面對反對派武裝勢力嘅疲態。

喺阿勒坡省其他地區，親土耳其武裝同庫德族部隊激戰。親土耳其勢力已奪下北部戰略城鎮泰勒里法特（Tal Rifaat）及周邊村落，導致當地約20萬庫德族人被包圍。由於當地通訊中斷，外界憂慮庫德族可能面臨「大屠殺」危機。

該地區長期係土耳其支持嘅部隊與庫德族戰士衝突嘅高危區，距離土耳其邊境僅約20公里。土耳其外交部長費丹（Hakan Fidan）就敘北局勢與美國國務卿布林肯（Antony Blinken）通話時，強調安卡拉支持「緩和緊張局勢」嘅舉措，但實際行動卻進一步加劇對庫德族嘅壓力。

敘政府軍並冇完全放棄反擊。俄羅斯國防部表示，俄空軍正配合敘軍喺阿勒坡省、哈瑪省（Hama）及伊德利卜省（Idlib）展開針對反政府武裝嘅行動。根據路透社援引俄國媒體報道，俄軍已對沙姆解放組織進行空襲，以支援敘政府軍。

與此同時，伊朗外長阿拉奇（Abbas Araghchi）訪問大馬士革，與巴沙爾·阿薩德會面，傳遞德黑蘭「堅定支持敘政府」嘅訊息。阿薩德喺會談後強調盟友支持對打擊「外國勢力支持嘅恐怖攻擊」至關重要。

敘利亞人權瞭望台指出，過去一週反政府勢力嘅攻勢已導致412人喪生，其中包括214名反對派成員、137名敘政府軍士兵及61名平民。隨住武裝衝突加劇，北部地區嘅人道危機進一步惡化，大量平民被迫逃離家園，敘北局勢持續緊繃。《I》