《YAHOO新聞》報道，喺美國晶片制裁風暴迫近之際，中國喺高科技領域可能面對困境，但低科技產業卻迎來突破。最近，擁有「中國修腳第一村」之稱嘅陝西紫陽縣修腳業界，正式進軍美國。以修腳創出年營收百億嘅遠元集團，上月喺布魯克林近華爾街開咗第一間分店，打住「捏住華爾街精英腳心」旗號，開始佔據國際市場一席位。

遠元集團首間美國店，選址喺布魯克林，距離華爾街只需10分鐘車程。招牌「鄭遠元」相當顯眼，街舖位置鄰近布魯克林市政廳地鐵站，吸引不少華爾街高薪精英成為客戶。店內服務價格相當貼地，例如20美元可享受一次修腳或足浴，呢個價錢同附近一份三文魚多士相若；如果選套餐服務，例如浴鹽足浴加修腳、背部放鬆等，50分鐘40美元。如果客人選用牛奶或花椒進行足浴，收費則會稍為調高。

浙江媒體以《中國師傅捏住華爾街精英腳心》為題報道此事，提到中國嘅洗腳師傅坐喺矮凳上，為美國客人提供貼心服務，並不時用英文詢問「舒唔舒服？」據了解，遠元集團目前喺中國已經擁有超過8300間連鎖門店，年營收達128.9億元人民幣，早已成為中國內地嘅一個重要產業。

紫陽縣早喺10多年前就開始打造修腳足浴產業鏈，並將其定為全縣四大重點產業鏈之一。修腳文化最初由遠元集團帶動，再由地方政府提供資金與場地支持，推廣修腳師傅嘅培訓。根據官方資料，截至今年10月，紫陽縣已有超過130間足浴相關企業，開設2.3萬間門市，吸納就業5.4萬人，去年營收達260億元人民幣。

遠元集團喺美國嘅首間門市，只係其國際化業務嘅冰山一角。今年，集團亦已經喺越南開設分店，進一步拓展亞洲市場。與此同時，中國嘅其他低科技產業，例如咖啡同生活用品，都紛紛走向海外。

例如中國咖啡品牌瑞幸，早前盛傳最快明年進軍美國市場，據悉每杯咖啡最平只需2美元，並計劃將首間門市開喺紐約，鎖定大量中國留學生同遊客。平價生活用品品牌名創優品（Miniso）就已經喺英國同法國建立銷售網絡，並於今年5月喺美國新澤西開設旗艦店，成為中國品牌「走出去」嘅又一成功案例。

喺中美競爭不斷加劇下，呢類唔需要高科技支援嘅產業，憑藉低門檻、高需求喺國際市場突圍，或將成為中國品牌搶佔海外市場嘅新方向。而「捏住華爾街精英腳心」嘅修腳師傅們，或許會成為中美經濟競爭下一個耐人尋味嘅細節。《I》