北韓向俄羅斯派出過萬名所謂「精銳部隊」，支援普京對烏克蘭嘅侵略戰爭，但呢批北韓軍隊喺現代戰爭中完全搞唔掂。最近有北韓軍失誤操作無人機，直接炸死自己友。

據《自由亞洲電台》報道，美國眾議院外交委員會主席麥考爾近日喺智庫「大西洋理事會」主持嘅懇談會上公開披露，北韓軍隊參戰期間鬧出荒唐事故。一架由北韓軍人操作嘅無人機，因技術不熟，竟然直接墜毀喺自己嘅部隊內，釀成嚴重死傷。

麥考爾話，呢啲北韓軍根本唔明現代化戰爭係乜，更無受過系統訓練，加上同俄軍語言唔通，協調零效率。佢形容北韓派兵完全係「增添混亂」，而唔係帶來支援。

同一時間，習近平喺巴西利亞同巴西總統盧拉舉行聯合記者會，談及烏克蘭問題時，呼籲要「匯集更多致力於和平嘅聲音」。不過，外界解讀，習近平其實面對咗極大壓力，因為包括德國總理朔爾茨同南韓總統尹錫悅在內嘅多國領袖，都要求佢向北韓施壓，阻止金正恩繼續派兵。

朔爾茨甚至直言，北韓派兵等同於升級戰爭，而尹錫悅亦借APEC峰會場合，要求習近平對北韓同俄羅斯嘅軍事合作採取更「建設性」嘅干預行動。據報拜登亦喺APEC峰會上向習近平傳遞咗類似訊息，強調北韓參戰同中國「緩和衝突」嘅立場背道而馳。

雖然北京官方未有明確表態反對北韓派兵，但有分析認為，北韓同俄羅斯嘅軍事合作加深，正令中國變得越來越尷尬。布魯金斯學會研究員金沛雅指出：「普京欠咗金正恩人情，令北韓更膽大妄為，甚至可能喺國內搞更多冒險行動，對中國反而帶來負面影響。」

不過，習近平亦唔敢得罪北韓或者俄羅斯，因為特朗普重返白宮嘅可能性，正令北京更擔憂未來中美對抗會升級。有專家形容，中國正喺國際舞台上玩「模糊戰術」，一方面支持俄羅斯嘅戰爭行動，另一方面避免激怒西方國家，尤其擔心貿易限制同制裁進一步打擊本已困難重重嘅中國經濟。

同時，美國正加強對中國支持俄羅斯戰爭行動嘅制裁。10月，美國就對中國多間公司祭出制裁，指控佢哋直接幫助俄羅斯製造遠程攻擊無人機。作為回應，中國外交部指責美國「抹黑施壓」，但冇對北韓派兵問題作任何明確評論。

歐盟亦警告北京，俄羅斯使用嘅攻擊無人機中，有部分係中國製造，並呼籲中國要承擔國際責任。分析認為，中國試圖喺支持俄羅斯同維持對美歐嘅經濟關係之間搵平衡，但呢場「平衡遊戲」似乎愈演愈難。中國喺北韓問題上嘅模糊態度，只會令北京更加孤立，最終可能自食其果。《I》