《自由亞洲電台》報道，北京對「一國兩制」又再有「新解釋」。基本法委員會副主任、人大法工委副主任張勇聲稱，「港人治港」唔係指香港只能由香港人治理，而係中央都要治港。呢個說法完全顛覆咗鄧小平喺80年代對香港人同國際社會作出嘅承諾，「高度自治」完全形同虛設。

張勇喺24日香港嘅國家憲法日講座上表示：「港人治港也是這樣，並不是說香港這個一千多平方公里，只能由香港人自己來治理，不是這個意思，有這個意思但不完全是。當然中央也要治港，不治港這個基本法哪裡來。鄧小平還說了一句話，不是所有人都能治港，要愛國者治港。所以說基本法104條就體現了要愛國者治港的原則。」

張勇聲稱，全國人大作為「主權者」，係最高權力機關，可以隨時行使佢哋認為應該行使嘅任何權利，並形容呢啲係「開口權利」，仲話全球國家都係咁樣運作，似乎係企圖將香港嘅情況「正常化」。

佢喺講座中將香港同內地其他地方政府比較，聲稱香港享有「高度自治」。佢舉例話：「其他民族自治地方不是通過了法律就能夠生效，香港立法會通過的法律，我們90個議員過半數表決後，馬上就能夠生效。那你說香港特區的自治權是不是高？是不是高度自治？你再看基本法內的160條，有多少高度自治權，所以高度自治是真的，不需要打引號，這就是憲法和特別行政區和香港的關係。」

張勇又提到，包括香港喺內嘅地方都要向全國人大常委會報備所制定嘅法律，由人大審查法案會唔會牴觸憲法或者基本法。根據張勇嘅數據，自1997年以嚟，香港已經報備咗844次，「下一步要作文字規定及進一步制度化」。

鄧小平喺1984年中英聯合聲明制定期間，多次向國際社會表明，「一國兩制」嘅核心係「港人治港」，即香港特別行政區由香港人自己管理，中央唔會干預香港嘅日常事務，干預範圍只限於外交同國防。

不過2014年中共喺《一國兩制白皮書》中首次提出「全面管治權」，明言「高度自治」係中央授權畀香港嘅。到2017年，習近平喺香港回歸20周年大會上再度強調「全面管治權」，又話要堅持中央對香港嘅全面管治同香港依法律享有嘅高度自治權齊頭並進。曾經承諾「除了外交和國防，港人享有充分自治權」嘅中共，已經完全拋開鄧小平當年對國際同香港人嘅保證，取而代之嘅係全面掌控。《I》