美國國會美中經濟同安全檢討委員會（United States-China Economic and Security Review Commission,簡稱USCC）近日向國會提交咗年度報告，當中首次建議取消中國嘅「永久正常貿易關係」（Permanent Normal Trade Relations, 簡稱PNTR）地位。呢項建議被視為可能徹底改變中美經濟同技術競爭格局嘅關鍵一步。對此，北京猛烈抨擊，批評美國「妄圖開歷史倒車」，令中美經貿關係進一步緊張。

PNTR係國際貿易中至關重要嘅一項政策安排，原本係指最惠國待遇，但授予咗永久地位，就唔需要每年進行審核。美國喺2001年正式授予中國PNTR地位，呢一政策多年嚟被視為中美經貿合作嘅基石。

但USCC喺最新嘅報告中指出，中國未能履行加入世貿組織（WTO）時承諾嘅市場開放同公平競爭原則，建議取消中國PNTR地位，認為此舉將有助應對中國經濟「不公平行為」，保障美國企業嘅利益。

若中國失去PNTR地位，其出口到美國嘅商品將適用非最惠國稅率，平均稅率高達42%，部分商品可能更高。特朗普早前甚至表示，有意將中國商品嘅關稅提升至60%以上，進一步向北京施壓。

中國外交部發言人林劍強烈譴責美國有關建議，指呢係對國際貿易規則嘅嚴重破壞，將對中美雙邊同全球經濟帶嚟嚴重衝擊，佢表示：「根據中美雙方就中國加入世貿組織達成的協議，美國2001年宣布給予中國永久正常貿易關係地位。美方一些政客妄圖開歷史倒車，將中美經貿關係拉回冷戰時期，這違反世貿組織規則，只會損害中美兩國共同利益，干擾全球經濟運行」。

此外，中國世界貿易組織研究會副會長霍建國進一步指出，PNTR係國際貿易協議嘅重要組成部分，取消PNTR將導致中國商品出口美國嘅關稅大幅提升，機械設備、汽車零件、電子產品等高端製造業首當其衝。

USCC報告提到，取消PNTR將令中國商品被視為「不友好國家」產品，適用高關稅同更嚴格嘅審查，將中國嘅貿易地位降至與北韓、古巴、俄羅斯等國同等水平。此外，美國國會或將重新啟動對中國貿易行為嘅年度審查，令雙方經濟合作充滿更多不確定性。

有分析指出，若特朗普提出嘅60%關稅政策落實，中國對美出口或將下降16%，整體出口增速下跌約2.3%，即損失超過800億美元。同時，美國國內亦將因進口成本增加而面臨更高消費壓力，雙方都將面臨經濟損失。

報告仲提到，針對現行對價值低於800美元商品嘅免關稅政策（即「小額豁免」政策），委員會認為呢項政策賦予中國電商平台不公平優勢，甚至可能成為非法商品進入美國嘅渠道。USCC建議取消呢項政策，令中國商品面臨更多關稅同審查壓力。《I》