《香港01》報道，世界盃亞洲區外圍賽第三輪C組，中國國足主場迎戰日本隊，最終以1：3落敗，未能報回首回合0：7大敗嘅一箭之仇。雖然場上表現較早前有進步，但場內外亂象頻生，從噓日本國歌、用激光筆干擾球員，到日本球衣球迷被辱「漢奸」等事件，引起日媒同網友群起批評，直指中國隊不但輸波，仲輸晒人。場地規格亦因被指「特殊操作」而再添爭議，今場比賽可以話喺多層面引爆話題。

激光筆直射日本門將 日網民怒批「輸人又輸波」

比賽尚未開始，現場氣氛已經劍拔弩張。當日本國歌《君之代》響起，全場中國球迷集體發出震耳欲聾嘅噓聲。部分日本球員嚴肅站立，有人選擇默默低頭，有人則平靜跟唱，但敵對氣氛瞬間瀰漫全場。據日媒《FOOTBALL ZONE》形容，噓聲「足以令全場震動」，進一步強化主場壓迫感。

反觀中國國歌《義勇軍進行曲》奏起時，全場6萬名中國球迷情緒高漲，整個球場陷入激昂氛圍。不過，據指當晚日本球迷寥寥無幾，場面呈現明顯失衡。

比賽進行至上半場17分鐘，場內突然出現綠色激光光束，直接射向日本門將鈴木彩艷面部。雖然干擾未對比賽結果造成明顯影響，但事件迅速引起日媒同網友熱議，直斥中國球迷行為失禮，缺乏體育精神。

鈴木彩艷賽後對事件表現冷靜，佢表示：「當時只係覺得『佢哋搞咩啊？』，並無太多理會。如果我因此分心，就正中佢哋下懷，呢啲事就交比相關負責人處理就好。」

事件曝光後，日本網友紛紛喺社交媒體留言：「呢啲冇品行為只會令中國足球形象更差！」亦有人諷刺：「贏3：1已經算客氣，再咁搞下次贏佢哋10：0！」，亦有人話：「球迷唔成長，球隊都唔會」。

中國場地規格被指「特殊操作」

除咗球迷行為爭議，場地規格亦被日媒批評。據報道，今場比賽嘅場地寬度由FIFA建議嘅標準68米縮減至65米。此舉被指意圖令中國隊喺場上壓迫同移動更加靈活快捷。

日本主帥森保一賽後表示：「場地嘅調整喺規則內，並無問題。我哋早喺賽前已收到消息，並進行相應準備。」不過，有「日本美斯」之稱嘅久保建英坦言：「場地比我想像中仲要窄，感覺中國隊嘅移動速度比某啲歐洲隊仲快。」

比賽期間，除咗激光筆干擾外，仲有一名背後寫住「中華男兒永不言敗」嘅中國球迷突然衝入場內。事件導致比賽短暫中斷，保安人員迅速將其制伏帶走。同時，場外亦有穿日本球衣嘅中國球迷遭到大批人圍堵，現場球迷大喊「漢奸」，甚至現場保安也強行將該球迷日本球衣除下。

對於上述事件，日本隊總教練森保一表示：「中國隊喺主場球迷鼓舞下確實變得更加積極，表現較上次有進步。但場內外風波難免影響比賽體驗。」

值得一提嘅係，早喺比賽前，中國足協已發出《文明觀賽倡議書》，呼籲球迷注重禮儀，包括「奏國歌時肅立行注目禮」、「禁止使用粗俗語言或過激行為」，但今場比賽顯然未能見效。《I》