《美國之音》報道，英國首相施紀賢（Keir Starmer）日前喺巴西里約熱內盧出席二十國集團（G20）峰會，喺記者會上被問到佢會唔會嚴厲譴責香港民主派初選47人案嘅判決時，選擇聚焦於推動英中經濟合作，冇用「譴責」字眼。此舉隨即引起英國香港人社群嘅不滿，批評工黨嘅對中政策簡直係「人格分裂」。

經濟優先 施紀賢避開譴責字眼

記者會上，英國《金融時報》記者追問施紀賢，會唔會以最強烈措辭譴責香港民主派47人案嘅判決，抑或佢會選擇保持沉默，因為佢正推動中英經濟合作。施紀賢冇直接回應，而係選擇強調中國係全球第二大經濟體，英國希望同中國維持緊密嘅經濟夥伴關係。

佢講：「我哋希望加強與中國嘅經濟合作，呢種合作會帶嚟經濟增長機遇。但同時，當我哋有分歧時，我哋需要坦率討論，正如我喺昨日與中方討論香港議題時所做。」佢補充，推動經濟合作與面對分歧並唔衝突，兩者都需要進行。

施紀賢喺早前接受英國廣播公司（BBC）訪問時，同樣被問到會唔會譴責香港判刑。佢再一次迴避，強調首要任務係振興英國經濟，指英國需要務實而認真嘅對華政策，避免過度對抗。

與習近平會晤提人權問題 英國記者被逐

星期一，施紀賢喺G20期間同中國國家主席習近平進行雙邊會談，係兩國領袖六年以嚟首次面對面會晤。據報，施紀賢喺會議上提出咗多個敏感議題，包括人權、台灣、南海以至香港，亦提及壹傳媒創辦人黎智英健康惡化問題。

不過，喺佢提到黎智英之後，中方即場要求英國記者離開會議室。呢個舉動被外界解讀為中方對英國領袖嘅公開挑釁，亦引發外界質疑英國是否喺中英談判中失去應有嘅立場。

施紀賢喺香港問題上嘅模糊表態，令喺英國嘅香港人社群感到憤怒。香港民主委員會（HKDC）高級國際倡議主任劉珈汶直言：「施紀賢嘅言論非常令人失望，英國係全球擁有最大海外香港人社群嘅國家，佢哋係因為逃避政治打壓而嚟到英國，尋求安全與自由。但工黨政府嘅態度令人心寒，甚至可以話係背叛咗呢班人嘅期望。」

劉珈汶指出，中國以經濟利益作為誘餌，試圖鉗制其他國家嘅行動。而英國作為一個有民主傳統嘅國家，應該喺人權問題上更有原則，而唔係選擇妥協。

學者：工黨對中國無能

對中政策跨國議會聯盟（IPAC）高級分析員鄺頌晴批評，工黨嘅對中政策混亂無章，令人無所適從。佢話：「工黨口講會審視中國威脅，但實際上佢哋又成日喺度講我哋需要中國投資。聽落簡直係人格分裂，完全無一致性。」

政治學者黃偉國認為，施紀賢嘅回應突顯工黨對中國議題嘅無能。他指出，喺大選期間，工黨候選人明顯不如保守黨咁積極處理香港議題。

黃偉國表示，施紀賢希望靠對中國低聲下氣換取更多經濟合作，但習近平根本無意理會，仲明顯唔畀英國面子，「工黨候選人喺大選前都唔敢簽署任何支持香港人權嘅承諾書，對於黎智英事件嘅表態亦非常被動。施紀賢喺記者被逐事件中嘅反應更加證明，工黨喺處理外交問題上完全無能力。」《I》