民主派初選47人案，45名被告因被以「串謀顛覆國家政權罪」分別被判囚50至120個月，引發國際廣泛批評及譴責，美國、澳洲及台灣官員紛紛抨擊判決，強調案件顯示香港民主、人權同司法自由嘅持續倒退。而國際人權組織亦紛紛表態，批評港府將司法武器化，對付和平參與民主活動嘅人士。不過，中國同香港政府迅速戰狼式回擊，指有關批評係干涉內政。保安局長鄧炳強更表明，可能就部分刑期提出上訴。

美國譴責判刑　將對港官實施制裁

美國駐港澳總領事館喺判刑消息公佈後即發聲明，強烈譴責相關判決，指控港府對47名被告作出政治檢控。聲明指，被告只係行使《基本法》賦予嘅政治權利，卻被重判入獄，係明顯係政治打壓。美國國務院隨後亦表態，形容判刑「嚴苛」，並宣布將對多名執行《港區國安法》嘅香港官員實施新一輪簽證限制。

美國國務院發言人強調：「被告只係和平參與受《基本法》保障嘅正常政治活動，香港政府卻將佢哋投入監獄。」美國重申敦促香港當局停止所有政治動機嘅檢控，並釋放所有政治犯。

澳洲外長黃英賢（Penny Wong）亦發聲明，表達對判刑結果嘅「嚴重關切」，並強烈批評港府無視基本人權，指責中國和香港當局持續執行《港區國安法》。黃英賢特別提到澳籍公民吳政亨嘅案件，稱會繼續爭取相關人士獲釋。

台灣陸委會發表聲明，形容案件係香港民主同人權進一步惡化嘅例證，深感不舍，並呼籲港府停止政治打壓，立即釋放被告。台灣總統府發言人郭雅慧亦批評中共政府，利用司法程序壓制香港民主派，破壞「一國兩制」同香港嘅高度自治承諾。

中港政府強硬回應　指責干預內政

中國外交部發言人林劍回應外界批評時表示，個別西方國家以司法個案為藉口，對香港法治無端指責，係對法治精神嘅踐踏。林劍強調，中國堅決反對外國干涉內政，並警告相關國家停止抹黑香港法治嘅行為。

中國駐港維護國家安全公署亦發聲明，指判刑結果彰顯《港區國安法》嘅權威，並反映被告罪行嘅嚴重性。公署批評西方國家政客同媒體，故意混淆視聽，對香港司法機關進行無端攻擊。

保安局長鄧炳強喺記者會上表示，判刑傳遞咗清晰信息，任何試圖顛覆國家政權嘅行為都唔會被姑息。佢又指，戴耀廷嘅「攬炒十步曲」企圖以民主自由之名顛覆政府，並誤導市民走向極端。鄧炳強強調，當局會根據判詞，考慮是否需要就部分刑期提出上訴。

國際人權團體：司法被武器化 顯示香港法治崩壞

由39個國家議會議員組成嘅「對中政策跨國議會聯盟」（IPAC）嚴厲譴責案件，形容判刑係香港法治倒退嘅明證，批評案件係對司法程序嘅濫用。聯盟呼籲各國重新審視同香港嘅經貿關係，並對香港官員實施進一步制裁。

國際特赦組織中國事務主任布沙拉（Sarah Brooks）表示，45名被告只係因和平參與民主活動而被判刑，無任何理由需留喺監獄。香港人權資訊中心亦認為，港府武器化法律，徹底剝奪市民嘅政治參與權利。

案件源於前香港大學法律學院副教授戴耀廷喺2020年提出嘅「攬炒十步曲」，該計劃透過民主派初選，爭取立法會過半議席，藉此否決財政預算案，從而迫使特首下台。47名被告中，31人認罪，16人經審訊後有14人被判罪成，兩人無罪獲釋。戴耀廷被判囚10年，鄒家成7年9個月，林卓廷6年9個月，黃之鋒4年8個月，毛孟靜4年2個月等。《I》