台灣《中央社》引述英國《金融時報》報道，美國總統當選人特朗普（Donald Trump）即將再度入主白宮，其抗中鷹派立場已令北京處於外交劣勢。中國駐美大使謝鋒被指不斷喺華府同紐約四處奔走，試圖接觸特朗普政府未來可能嘅官員，但成效乏善可陳。現時北京核心疑問集中於：「特朗普究竟想要乜？」

北京急於打通人脈

前白宮國家安全會議亞洲事務資深主任麥艾文（Evan Medeiros）形容，特朗普勝選令中國「完全手足無措」。現任喬治城大學教授嘅麥艾文透露，喺大選前曾經與謝鋒會面。佢話：「北京正急於說服特朗普核心圈內嘅商界領袖對中國持更溫和嘅態度。」

但北京嘅外交努力受阻，特別係共和黨近年對中立場越來越鷹派，令中國官員更難與華府建立聯繫。曾任美國國會山莊外交事務委員會職員嘅科瓦萊夫斯基（Ann Kowalewski）指出，許多國會山莊官員唔願意同中國官員會面，「佢哋認為呢啲會面只係中國官員朗讀談話要點，並唔會有建設性」。

鷹派掌舵 北京愈見孤立

特朗普宣布提名抗中鷹派人士出任多項要職，包括國家安全顧問瓦爾茲（Mike Waltz）同國務卿盧比奧（Marco Rubio），被視為北京外交策略嘅嚴峻考驗。同時，外界亦關注特朗普將任命誰出任財政部長，以及貿易代表萊特海澤（Robert Lighthizer）會否入閣。

北京官員亦密切留意特斯拉創辦人、世界首富馬斯克（Elon Musk）喺特朗普政府中可能扮演嘅角色。馬斯克喺中國有龐大商業利益，並已進入特朗普嘅核心圈，被視為中方可藉以尋求突破嘅橋樑。

一位匿名中國共產黨內部人脈受訪者透露：「北京希望可以同特朗普達成協議，但最大問題係我哋根本唔知道特朗普嘅目標係乜。」佢進一步指出，特朗普嘅首個任期內，北京喺多次談判中已感到挫敗，「經過頭4年，我真係認為北京對再度與特朗普政府達成協議嘅期望非常之低。」《I》