《彭博社》報導，美國司法部正計劃向聯邦法院申請，強制科技巨頭Google出售旗下搜尋引擎Chrome，並對其人工智能（AI）同Android操作系統實施嚴厲限制。呢場反壟斷戰爭有可能徹底改變網上搜尋市場同AI行業嘅競爭格局。不過，司法部對相關消息暫時未有作出評論。

據消息人士透露，美國司法部反壟斷部門高層官員，聯同多個州嘅代表計劃喺本周三向聯邦法官Amit Mehta提出建議，包括要求Google分享數據許可權，從而推動市場競爭。如果法庭接受呢啲建議，Google嘅市場主導地位可能會被削弱，甚至連Chrome嘅出售都唔係冇可能。

彭博報道指，政府可能會視情況選擇延遲對Chrome嘅出售要求，直到確認市場競爭有無改善。今年8月，美國哥倫比亞特區聯邦法院已裁定，Google違反反壟斷法，指其透過耗資數十億美元確保喺全球成為預設搜尋引擎，建立非法壟斷。不過，當時法院未有宣布罰則，但市場已經預期Google有可能面臨分拆同高額罰款嘅命運。

Google對呢項建議表示強烈反對。負責監管事務嘅副總裁李安·穆荷蘭（Lee-Anne Mulholland）批評司法部「推進激進議程，超越咗法律範疇」，認為政府咁樣做只會「損害消費者、開發者同美國技術領導地位」，尤其喺美國技術競爭力備受關注嘅時候。

Google強調，自家搜尋引擎之所以受歡迎，係因為其質量高、用戶信任，並指公司喺市場上面對來自亞馬遜（Amazon）等平台嘅激烈競爭。Google仲指出，用戶可以自由選擇其他搜尋引擎作為預設選項。《I》