台灣《自由時報》引述印尼《雅加達郵報》報道，中國中車四方製造嘅無人駕駛電車（ART），喺今年8月運抵印尼新首都努山塔拉（Nusantara），原本被視為中國「軌道外交」嘅新里程碑。不過，經過內部測試後，發現呢款電車存有多項安全隱患，表現遠未達標，最終印尼政府決定將電車退回中國。

宣傳噱頭下嘅「智能」電車 測試暴露缺陷

ART 系統融合火車、電車同巴士優勢，號稱係一種智慧公共交通方案，使用感應器同橡膠輪，喺有軌同無軌道路上均可運行，並採用電池供電，利用道路標記同磁鐵代替傳統鐵軌。喺今年8月3日，中國中車製造嘅ART電車正式抵達印尼新首都，時任總統佐科威（Joko Widodo）更親自試乘，形容ART能為努山塔拉打造一個綠色環保嘅交通系統，減輕城市污染。

IKN管理局喺9月至10月期間，針對ART電車喺努山塔拉中央政府區（KIPP）進行試驗，結果暴露咗多項技術問題。管理局副代表貝拉維（Mohammed Ali Berawi）表示，評估小組發現，自動駕駛系統喺緊急情況下無法自動處理，司機需要隨時手動接管，「司機要時刻將手放喺方向盤，準備隨時切換至手動操作。」

更加致命嘅係，自動煞車系統未能喺列車前方有障礙物時即時減速或發出警告，亦缺乏針對特定路線嘅速度同煞車計劃。貝拉維直言，呢啲問題顯示開發商對電車自動駕駛技術嘅可靠性缺乏信心。

中國「軌道外交」遇挫　未來前景成疑

對此，IKN管理局數位生態系統開發總監托尼（Tonny Agus Setiono）透露，現時正同印尼交通部討論退回ART列車嘅計劃，預計最快今年完成。印尼交通部表示，ART測試費用由供應商承擔，即使項目終止，政府亦唔會蒙受任何損失。

印尼交通部鐵路總幹事利沙（Risal Wasal）亦補充指，ART系統未能符合IKN管理局訂立嘅技術規範，概念驗證結果顯示系統運作表現不佳，無法滿足實際運營需求。

ART項目嘅失敗為中國喺海外推動「軌道外交」敲響警鐘。呢款智能電車曾被譽為中國製造同技術出口嘅一張新名片，但經過印尼此次測試後，其技術可靠性同市場前景均面臨嚴峻挑戰。《I》